Завхан аймагт өдгөөгөөс 80 жилийн өмнө өндөр ашиг шимтэй малыг шалгаруулж байжээ.
Завхан аймагт 1946 онд өндөр ашиг шимтэй малыг анх удаа шалгаруулж, цаашид малынхаа үүлдэр угсааг сайжруулах тал дээр илүү анхаарч ажиллах бодлогыг таниулж байсан тухай “Нэгэн зууны он дарааллын шастир” номд өгүүлжээ.
Номд өгүүлснээр, Завхан аймаг хөдөлмөр бүтээлийн өндөр амжилт үзүүлж, урд жилийнхээс 105,1 мянган толгойгоор малаа өсгөж, мал, ноос, хялгас, сүү, тос, өвс, хадлан, хашаа хороо, худаг усны талаар тавьсан зорилтоо бүрэн биелүүлжээ. Аймаг 25 жилийн ойн улсын уралдаанд амжилттай оролцож, БНМАУ-ын Сайд нарын зөвлөл, МАХН-ын Төв хорооноос улаан туг, 60 мянган төгрөгөөр шагнуулсан байна. 1946 онд тус аймгаас улсын сайн малчин 40 гаруй, аймгийн сайн малчнаар 120 хүн шалгарч, мянгаас дээш малтай аж ахуйтан 8 болжээ.
Мөн оны онцлох үйл явдал нь өндөр ашиг шимтэй малыг тодруулах, таниулах, сэлгэн ашиглах ажил байв. Малчдын малыг хүндийн жин, хурд, хүч, тарга, тэвээрэг, ноос, ноолуур, сүү, шим, төлөрхөг чанараар нь шалгаруулсан байна.
Алдархаан сумын Б.Цэрэндаш, Завханмандалын С.Дүгэржавын хуц, Алдархааны З.Дуламжав, Тэлмэн сумын Ж.Ундрах, А.Дашжамц, Р.Гомбосүрэн, Дөрвөлжин сумын М.Гансүрэн, Ургамал сумын М.Мандир, С.Тогтох, С.Жамц, Жавхлант сумын Д.Дэндэв, Завханмандал сумын Г.Ринчин, Д.Ринчин, Дөрвөлжин сумын Н.Балхүүгийн эр хонь өндөр ашиг шимтэй малаар шалгарч байв.
Тэлмэн сумын А.Дашжамц, Ургамалын Г.Гомбожав, М.Дагва, Жавхлант сумын Б.Мягмар, Дөрвөлжин сумын Л.Заяатын эм ямаа, Г.Маагийн ухна, Алдархааны Ч.Жамъян, Жавхлант сумын Д.Далхжавын хурдан морь, Тэлмэн сумын Ц.Лувсангийн азарга, Завханмандал сумын С.Дүгэржав, Дөрвөлжин сумын Ж.Эрэнжавын морь өндөр ашиг шимтэй малаар шалгарсан байна.
Алдархааны М.Чоймбоо, Ургамал сумын С.Бадарчийн сарлагийн бух, Т.Дамдингийн хайнагийн шар, Завханмандал сумын Г.Ринчингийн ингэ зэрэг олон мал хүндийн жин, хурд, хүч, тарга, тэвээрэг, ноос, ноолуур, сүү, шим, төлөрхөг чанараараа тус тус шалгарч байжээ. Малынхаа үүлдэр угсааг улам сайжруулах, сайн үүлдрийн малыг тусгайлан өсгөх тал дээр илүү анхааран ажиллах шийдвэрийг тухайн жил гаргаж байсан байна.
Эх сурвалж: Монцамэ агентлаг