Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд хатуу чихэр үйлдвэрлэгч “Бурамхан” брэнд буюу “Цайдам Трейд” ХХК-ийн үйл ажиллагаатай танилцлаа.
Бурамхан брэнд нь 2018 оноос эхлэн үйл ажиллагаагаа явуулж эхэлсэн бөгөөд 100% гараар урласан, байгалийн гаралтай жимсний охь агуулсан 30 гаруй төрлийн хатуу чихрийн бүтээгдэхүүн үйлдвэрлэдэг.
“Бурамхан” брэндийн хамт олон шинэ үйлдвэрээ 2024 онд ашиглалтад оруулан бүтээгдэхүүнээ хөгжүүлж, амттан үйлдвэрлэлээр дэлхийд тэргүүлэгч Швейцар улсын “Ricola” үйлдвэрийн экспертийг үйлдвэртээ урьж олон сарын хугацаанд хамтран, сахаргүй чихрийн туршилтыг амжилттай хийж бүтээгдэхүүний нэр төрлөө нэмсэн.
Хоногтоо нэг тонн чихэр үйлдвэрлэх хүчин чадалтай, 3000 орчим худалдааны цэгээр худалдаалагддаг байна.
Цаашид импортыг орлох чанартай бүтээгдэхүүн үйлдвэрлэн, дотоодын чихэрний хэрэгцээг бүрэн хангаж, чихрийн зөв зохистой хэрэглээг түгээхээр ажиллаж байгаа юм. Сахаргүй чихрийн үндсэн түүхий эдээр изомалт болон стевиа ашиглаж байгаа бөгөөд эдгээр нь сахар орлуулагчийн төрлүүдээс органик байдлаар дээгүүрт ордог байна. Сахаргүй чихэр нь чихрийн шижин, чихрийн харшилтай хүмүүс хэрэглэх боломжтойгоос гадна шүдэнд сөрөг нөлөөгүй, цусан дахь сахрын хэмжээг нэмэгдүүлэхгүй, турах хүсэлтэй хүмүүст нэн тохиромжтой бүтээгдэхүүн аж. Тиймээс чихрийн шижин өвчний асуудалтай хүмүүс уг чихрийг санаа зоволтгүй идэж болно.
Монголын эдийн засаг, чихрийн зах зээлийг судалбал жил 70 тэрбум төгрөгийн чихэр импортоор орж ирдэг. Үүний тодорхой хувийг, 10-20 хувьд нь өөрийн бүтээгдэхүүнийг байлгахаар ажиллаж буй тэрбээр хүн бүрийн хувьд хэцүү цаг үе байгаа ч үйлдвэрлэл, хөнгөн үйлдвэр бол монголын ирээдүй гэж боддог тул энэ тал дээр анхаарал хандуулах нь зүйтэйг онцолж байв.
Мөн олон сарын судалгаа, шинжилгээний үр дүнд шимт чанараар эхийн сүүтэй хамгийн ойр, говийн охь шим болсон ХООРМОГТОЙ ЧИХЭР үйлдвэрлэж байгаа юм.
Хоормогт агуулагдах витамин A,C,D,E,B, кали, магни, кальци, фосфор, төмөр, цайр зэрэг олон төрлийн эрдэс бодис нь эрүүл хооллолтыг дэмжиж, зүрх, судас, элэг, цөс , бөөрний хэвийн үйл ажиллагаанд тустай. Байгалийн гаралтай энэхүү амттан нь таны биед хэрэгтэй шим тэжээл, эрч хүчийг нөхөн сэргээж, өдөр тутмын эрүүл сонголт байх болно.
