Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцаж “Грийн Групп”-ийн гоймонгийн үйлдвэрт ажиллалаа.
Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвдөх Ч.Даваабаяр, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн болон салбарын төлөөллүүд ажиллалаа.
“Хүнсний хувьсгал” үндэсний хөдөлгөөний хүрээнд олгогддог бага хүүтэй, урт хугацаатай зээлд хамрагдан өдөрт 100 тн бүтээгдэхүүн үйлдвэрлэх хүчин чадал бүхий Талын Монгол брэндийн гоймонгийн бүрэн автомат үйлдвэрийг ашиглалтад оруулжээ.
Мөн олон улсын стандарт хангасан үйлдвэрлэлийн байранд, дэлхийн хүнсний салбарт мөрдөгддөг НАССР, GMP, ISO тэргүүтэй стандарт, шаардлагуудыг ханган бүтээгдэхүүн үйлдвэрлэж, инновац шингээн хэрэглэгчдэд хүргэж буй.
“Хүнсний хангамж, аюулгүй байдал” үндэсний хөдөлгөөний үр дүнд ажиллах хүчээ 29%-аар өсгөн, НДШ 33%, НӨАТ 25%, ХХОАТ 15%-аар тус тус нэмэгдүүлжээ.
Гадаад зах зээлд хэдийн байр сууриа эзэлж, “Талын Монгол” брэндээ Хятад, Орос, Турк, Казахстан, Узбекистан, Киргиз Улсад нийлүүлж байна.
Хүнс үйлдвэрлэл, худалдаа, барилга бүтээн байгуулалт, санхүү хөрөнгө оруулалтын чиглэлээр үйл ажиллагаа эрхэлдэг бөгөөд бүтээгдэхүүн үйлчилгээндээ дэвшилтэт технологи, инноваци шингээн, бизнесийн түншлэлийн төгс хувилбарыг нэвтрүүлэн ажилладаг байна.
“Грийн групп” нь бүрэлдэхүүндээ зургаан охин компанитай ба 30 гаруй брэндийн 600 гаруй нэр төрлийн бүтээгдэхүүнийг дотоодын зах зээлд амжилттай нэвтрүүлжээ. Одоогийн байдлаар 1220 хүнийг тогтмол ажлын байраар хангахдаа насны бүлэг, хүйс, тусгай хэрэгцээт иргэдийг тэгш хамруулан, сурах, өсөн дэвших боломжоор бүрэн хангаж, Монгол Улсын хөдөлмөрийн зах зээлд өөрсдийн хувь нэмрийг оруулж байна.
Үйлдвэрлэлдээ нэвтрүүлсэн чанарын тогтолцоонууд:
- Чанарын удирдлагын тогтолцоо MNS 9001:2010
- Хүнсний аюулгүй байдлын удирдлагын тогтолцоо ISO 22000:2018
- Байгаль орчны удирдлагын тогтолцоо MNS ISO 14001:2016
- Хөдөлмөрийн аюулгүй байдал, эрүүл ахуйн менежментийн тогтолцоо ISO 45001:2018
2022-2025 онд “Хүнсний хувьсгал”-ын хүрээнд 2,500 гаруй аж ахуйн нэгжид эргэлтийн болон хөрөнгө оруулалтын хэлбэрээр 1.3 их наяд төгрөгийн урт хугацаатай, бага хүүтэй, хөнгөлөлттэй зээл олгосон.
Үүний дүнд аж ахуйн нэгжүүдийн хүчин чадал доод тал нь хоёр дахин нэмэгдэн, 53 үйлдвэр ашиглалтад орж, хүнсний 1,000 гаруй нэр төрлийн бүтээгдэхүүн шинээр үйлдвэрлэж байна.
