МУСГЗ Ч.Даваабаярын хүндэтгэлийн арга хэмжээнд зориулж аав Ц.Чимиддоржийн тухай дурсамж яриаг хүргэж байна.
Юуны урьд өөрийнхөө ариун цагаан хөдөлмөр зүтгэлээр төрийн дээд шагнал хүртсэн Ч.Даваабаяр гавьяатдаа баяр хүргэж улам их амжилт хүсье.
Миний хувьд бол Ч.Даваабаяр гавьяатын аав Ц.Чимиддорж гуайтай хамт ажиллаж байсан тэр хүний мэргэжил нэгт хуурай дүү нарынх нь нэг учраас ахынхаа талаар /аавынх нь талаар/ товч боловч хөндөж өгөх нь зүйтэй болов уу?
Шүүх яамны Ц.Чимиддорж гэж манай үеийн хуульчид бүгд мэддэг мэргэжилдээ эзэн болсон тэр сайхан ажил хэрэгч хүнээс бид мэргэжлийн арга ухаан, онол практикийн зүг чиг олж авцгаадаг байлаа.
Бүр тодруулаад хэлбэл, 70, 80-аад оны Монгол улсын сүүлийн 50 гаруй жилийн хууль тогтоомжийг Шүүх яамны Чимиддорж ахайтан ахлан хүчинтэй-хүчингүй, норматив-норматив бусаар нь ангилж хэдийд ямар нэмэлт, ямар өөрчлөлт орсныг нь эмхэлж цэгцэлж, системчилж, эрэмбэлж, кодификац логик дараалалд оруулсан нь үндэсний хэмжээний том ажил, том төсөл болсон түүхтэй.
Энэ том төслийг Шүүх яамны ахлах мэргэжилтэн, хэлтсийн дарга, хуульч Чимиддорж ахайтан маань гардан хийж бид бүгдийг манлайлж, хөдөлмөрлөсөн агуу том бүтээн байгуулалт болсон юм. Энэ ажил нь одоо ч гэсэн УИХ-ын тамгын газар, ЗГ-ын хэрэг эрхлэх газар, Хууль зүй дотоод хэргийн яамны үндсэн гол хэрэглээ болон ашиглагдаж байгаа.
Өнөөдрийн кодификац системчлэл яг Чимиддорж гуайн хийсэн тэр сууриараа хэрэгжиж байгаа даа.
Товчдоо бол манай үеийнхэн Монголын хууль тогтоомжийг ингэж нэг юм эмхэлж цэгцэлснээр дарга даамлуудын дур зоргын аливаа шийдвэр хууль зүйн шинжлэх ухааны үндэслэлтэй болсон бөгөөд өнөө цагийн хууль зүйн салбарын мэргэжилтнүүд “Та тийм хуулийн ийм зүйл заалтыг зөрчсөн байна” гэж хэлэх үгтэй, хяналтын баазтай, гартаа барих зэвсэгтэй болгож өгсөн хүний нэг бол Шүүх яамны Ц.Чимиддорж хуульч ахайтан мөн юм шүү.
Сайн хүний үр, сүүт гүүний унага гэж Монгол ардын сайхан үг байдаг шиг удам дамжсан хөдөлмөрч гэр бүлээс төрөн гарч аав шигээ төр түмний төлөө зүтгэж, үндэсний үйлдвэрлэгч баялаг бүтээгчдийн нөр их ажил үйлсийг манлайлж яваа Чимиддоржийн Даваабаяр гавьяатын маань зорьж бүтээж яваа ажил үйлсэд нь хамгийн сайн сайхан бүхнийг хүсэн ерөөе!
