Удахгүй болох сар шинийн баярыг тохиолдуулан уламжлалт “Цагаан сар” үзэсгэлэн худалдааг өнөөдөр нээлээ.
Аймгийн ЗДТГ, ХХААГ-аас хамтран зохион байгуулдаг үзэсгэлэн худалдаанд 14 сумын 210 үйлдвэрлэл, үйлчилгээ эрхлэгч оролцож байгаа юм. Сар шинийн баярын идээ ундаа, цагаан идээ, бэлэг, хувцас, эд хэрэглэлийг нэг дороос хүргэх зорилготой үзэсгэлэн худалдаанд орон нутгийн бизнес эрхлэгчид, аж ахуйн нэгж, хоршоо оролцож мах, сүүн бүтээгдэхүүн, үндэсний хувцас, хүнсний төрөл бүрийн бүтээгдэхүүнийг хэрэглэгчдийн гарт хүргэдэг.
“Цагаан сар” үзэсгэлэн худалааны энэ жилийн онцлог нь говийн нутгаар цас багатай дулаахан, өнтэй өвөл болж байгаа тул малын мах тарган, ашиг шим сайтай, сүү цагаан идээ элбэг байна гэж худалдаачдын төлөөлөл ярив.
Цагаан идээний үнэ ханш сонирхвол, нэг кг ааруул 30.000-45.000, өрөмний шар тос 45.000-65.000, цөцгийний шар тос 45.000-65.000, цагаан тос 30.000, хайлмаг 30.000, сүү 5000 төгрөгөөр тус тус худалдаж байна. Харин ууц 350-700 мянган төгрөгийн үнэтэй байна.
Үзэсгэлэн худалдааны үеэр мах, сүү, нарийн боов, бүтээгдэхүүний баглаа боодол, жижиг дунд үйлдвэрлэгч, өрхийн үйлдвэрлэгч чиглэлээр шилдгүүдийг тодруулж урамшуулна. Үзэсгэлэн худалдаа өнөөдрөөс эхлэн арав хоног үргэлжилнэ.
Эх сурвалж: Монцамэ агентлаг
