МҮХАҮТ-аас 2026 оны 1 дүгээр сарын 2-ны өдрөөс эхлэн гарал үүслийн гэрчилгээг цахимаар олгож, баталгаажуулалтын веб сайтыг ашиглалтад оруулснаар экспортлогч аж ахуйн нэгж, хувь хүмүүс заавал биеэр ирж цаасан бичиг баримт бүрдүүлэх шаардлагагүй болсон. Экспортлогчид төрийн үйлчилгээний “Танилт нэвтрэлтийн ДАН систем”-ийг ашиглан хүсэлт болон дагалдах материалуудаа цахимаар илгээж, цахим гэрчилгээгээ хүлээн авах нөхцөл бүрдээд байна.
Шинээр байгуулсан гэрээний хүрээнд МҮХАҮТ-аас олгосон цахим гарал үүслийн гэрчилгээний мэдээлэл Гаалийн ерөнхий газрын цахим системд шууд дамжих бөгөөд ингэснээр гаалийн бүрдүүлэлтийн шат дамжлага цөөрч, хугацаа хэмнэх ач холбогдолтой. Мөн гэрчилгээ дээрх нууцлал бүхий 16 оронтой код болон QR кодыг ашиглан олон улсын гаалийн байгууллагууд хаанаас ч гэрчилгээний үнэн зөв байдлыг шалгах, баталгаажуулах бүрэн боломжтой болж, Монгол Улсын экспортын бүтээгдэхүүний олон улсын зах зээл дэх өрсөлдөх чадвар, итгэлцэл нэмэгдэж байна.
Тус хамтын ажиллагааны гэрээг МҮХАҮТ-ын Ерөнхийлөгч Б.Лхагважав, ГЕГ-ын дарга П. Дэлгэрнаран нар үзэглэлээ. Уулзалтад ГЕГ-ын дэд дарга Г.Энхтайван, МҮХАҮТ-ын Гүйцэтгэх захирал Ц. Магнайбаатар болон холбогдох албаны мэргэжилтнүүд байлцав.
эх сурвалж: МҮХАҮТанхим мэдээллийн сайт