Ховд аймагт хаврын тариалалтын бэлтгэл ажлууд эхэлжээ.

Тус аймагт 3200 гаруй газар тариалан эрхлэгч бий. Тэд өнгөрсөн онд 3200 га талбайд жимс жимсгэнэ, төмс, хүнсний ногоо тарьж, 29.9 мянган тонн ургац хураан авч, зах зээлд нийлүүлсэн юм. Тэгвэл энэ жил тариалалтын талбайн хэмжээг нэмэгдүүлэх, услалтын системийг өргөтгөх, сэргээн засварлах чиглэлд анхаарч байна.

Урьдчилсан байдлаар 3500 га талбайд тариалалт хийхээр төлөвлөсөн бөгөөд 600 гаруй бага, дунд оврын трактор, багаж, тоног төхөөрөмж, техник хэрэгсэл ашиглах талаар Ховд аймгийн Хүнс, хөдөө аж ахуйн газраас судалгаа гаргажээ.

Хаврын тариалалтын хүрээнд Эрдэнэбүрэн, Булган, Буянт, Алтай сумын услалтын системийг сэргээснийг ашиглана. Тариаланчид хөнгөлөлттэй зээлд хамрагдах, техник дундын үйлчилгээ нэвтрүүлэх зэргээр газар тариалан үйлдвэрлэлийг өргөжүүлж байна.

Мөн зарим нэр төрлийн хүнсний ногоо, бүтээгдэхүүний чанарт анхаарч, үр сортыг шинэчлэх туршилтын олон ажил хэрэгжүүлж байна. Өнгөрсөн онд л гэхэд Ховд аймгийн Булган сумын нутагт цагаан будааны туршилтын тариалалт хийсэн юм.

Эх сурвалж: Монцамэ агентлаг