“Монгол Улс дахь пестицидийн хэрэглээ: өнөөгийн байдал, эрсдэл, бууруулах арга хэмжээ ба төрийн бодлого” сэдэвт хэлэлцүүлэг амжилттай зохион байгуулагдлаа. /2026.04.08/
Тус хурлыг “Хүнсний хувьсгал” үндэсний хөдөлгөөний хүрээнд Хөдөө аж ахуйн их сургууль, Агроэкологийн сургууль хамтран Боловсролын яам, Хүнс, хөдөө аж ахуй, хөнгөн үйлдвэрийн яам, Ургамал хамгааллын газар болон холбогдох байгууллагуудтай хамтран зохион байгуулсан юм.
Хэлэлцүүлгийн зорилго нь Монгол Улсад пестицидийн хэрэглээний өнөөгийн нөхцөл байдал, түүнтэй холбоотой эрсдэл, тэдгээрийг бууруулах бодлого, эрх зүйн зохицуулалтын хэрэгжилтийг хэлэлцэх, цаашдын хамтын ажиллагааг өргөжүүлэхэд чиглэж байв.
Арга хэмжээг нээж ХААИС-ийн ректор Б.Баасансүх, “Хүнсний хувьсгал” ТББ-ын Гүйцэтгэх захирал Б.Батцэцэг холбогдох байгууллагын төлөөллүүд үг хэлж, салбарын өнөөгийн нөхцөл байдал, бодлогын чиглэлийг тодорхойллоо.
Мөн холбогдох байгууллагуудын төлөөлөл Монгол Улсад хэрэглэгдэж буй пестицидийн импорт, чанар, хяналт, хүнсний бүтээгдэхүүн дэх үлдэгдлийн шинжилгээний үр дүн, цаашид анхаарах асуудлуудыг хөндөн ярилцав.
Хэлэлцүүлгийн үеэр оролцогчид пестицидийн бүртгэл, хэрэглээний мониторинг, туршигдсан химийн болон биологийн бодисын үр дүн, шинжлэх ухааны ололтыг практикт нэвтрүүлэх боломжийн талаар санал солилцож, асуулт, хариултын өргөн хэлэлцүүлэг өрнүүлсэн юм.
Арга хэмжээний төгсгөлд оролцогчид бодлогын зөвлөмж боловсруулж, пестицидийн зохистой хэрэглээг дэмжих, эрсдэлийг бууруулах чиглэлд хамтын ажиллагааг эрчимжүүлэх шаардлагатайг онцоллоо.
“Хүнсний хувьсгал” үндэсний хөдөлгөөний хүрээнд хүнсний аюулгүй байдал, хөдөө аж ахуйн үйлдвэрлэл, тэр дундаа пестицидийн зохистой хэрэглээний асуудлаар сүүлийн жилүүдэд цуврал хэлэлцүүлгүүд Төрийн ордон-д зохион байгуулагдаж ирсэн.
Эдгээр хэлэлцүүлэг нь салбарын тулгамдсан асуудлыг олон талын оролцоонд тулгуурлан хэлэлцэх, бодлогын шийдлийг илүү нарийвчлан тодорхойлох боломжийг бүрдүүлж, улмаар пестицидийн хэрэглээтэй холбоотой эрдэм шинжилгээ, бодлогын сүүлийн үеийн хурлуудтай уялдан илүү судалгаанд суурилсан, бодитой шийдэлд чиглэсэн хэлэлцүүлгийг өрнүүлэх чухал суурийг тавьсан.
