“Хүнсний бүтээгдэхүүний аюулгүй байдлыг хангах хууль тогтоомжийн хэрэгжилт Говь-Алтай аймагт” сэдэвт хэлэлцүүлэг өнөөдөр Нутгийн удирдлагын ордны Иргэний танхимд болж байна.
Тус хэлэлцүүлгийн зорилго нь хүнсний бүтээгдэхүүний аюулгүй байдлыг хангах тухай хууль тогтоомжийн хэрэгжилтэд үнэлэлт, дүгнэлт өгөх, холбогдох байгууллагуудын мэдээлэл солилцоог сайжруулахад оршиж байна. Мөн цаашид хууль тогтоомжийг нэг мөр хэрэгжүүлэх, нийтийн ашиг сонирхлыг хамгаалах чиглэлээр авч хэрэгжүүлэх арга хэмжээг тодорхойлоход зорилгоор хэлэлцүүлгийг өрнүүлж буй юм.
Хэлэлцүүлгийг Говь-Алтай аймгийн прокурорын газрын ахлах прокурор Б.Түвшинтөр нээн үг хэлж, хүнсний аюулгүй байдлыг хангах нь иргэдийн эрүүл мэнд, амьдралын чанарт шууд нөлөөлөх чухал асуудал болохыг онцлоод, төрийн болон хяналтын байгууллагуудын уялдаа холбоо, хамтын ажиллагааг сайжруулах шаардлагатайг дурдсан юм.
Хэлэлцүүлэгт аймгийн прокурорын газар, цагдаагийн газар, хүнс, хөдөө аж ахуйн газар, стандарт, хэмжил зүйн хэлтэс, эрүүл мэндийн байгууллагууд, орон нутгийн төрийн байгууллагын төлөөлөл, аж ахуйн нэгж, иргэд оролцож, хүнсний аюулгүй байдлын чиглэлээр хийж хэрэгжүүлж буй ажил, цаашид анхаарах асуудлын талаар санал солилцож байна.
Эх сурвалж: https://www.montsame.mn/