Өмнөговь аймаг “Түмэн тэмээний баяр”-ыг тэмээний амьдын үнэлэмжийг нэмэгдүүлэх, тэмээнээс гарах бүтээгдэхүүнийг олон нийтэд сурталчлан борлуулах, тэмээчдийн хөдөлмөрийг үнэлж бүтээгдэхүүнийг иргэдэд шууд хүргэх боломжоор хангах зорилготой 29 дэх жилдээ энэ сарын 6-8-ны өдрүүдэд зохион байгууллаа.

Харин ингэний айргийн баярыг 17 дахь жилдээ хамтатган зохион байгуулсан юм. Энэ жил “Өсөлттэй-Өмнөговь-Нутгийн үйлдвэрлэгч” нэрийн дор үзэсгэлэн худалдаа гаргаж, 83 нэр төрлөөр найман аймаг, нийслэл, 15 сумын 210 гаруй иргэн, аж ахуйн нэгж сүү сүүн бүтээгдэхүүн, гар урлал, газар тариалангийн чиглэлээр оролцож 300 сая гаруй төгрөгийн борлуулалт хийсэн Өмнөговь аймгийн ХХААГ-аас мэдээллээ.

Мөн шилдгүүдийг тодруулж, өргөмжлөл болон мөнгөн шагналаар шагнасан юм.

• “Хамгийн зохион байгуулалттай оролцсон сум”-аар Номгон сум
• “Хамгийн зохион байгуулалттай оролцсон нэгж”-ээр Баяндалай сумын Наран баг
• “Хамгийн олон нэр төрлийн, их бүтээгдэхүүнтэй оролцсон нэгж”-ээр Гурвантэс сумын иргэн Б.Эрхэмбаяр
• “Өндөр чанартай бүтээгдэхүүн үйлдвэрлэгч”-ээр Баяндалай сумын иргэн Д.Энхгэрэл
• “Шилдэг гар урлал”-аар Даланзадгад сумын иргэн Б.Болдмаа
• “Олны таашаалд нийцсэн бүтээгдэхүүн”-ээр Баяндалай сумын иргэн Ч.Отгончимэг
• “Шилдэг бүтээгдэхүүн үйлдвэрлэгч”-ээр Даланзадгад сумын “Солид партнерс групп” ХХК-ийн ингэний сүү, сүүн бүтээгдэхүүний “Camwell” брэнд тус тус шалгарчээ.

Өмнөговь аймгийн хэмжээнд хоёр ингэний ферм үйл ажиллагаа явуулж байгаа бөгөөд тэмээг байнгын тэжээлийн аргаар тогтмол сааж, ингэний сүүг орчин үеийн үйлдвэрийн шугам, технологиор боловсруулан дотоод болон гадаадын зах зээлд нийлүүлэхээр зорин ажиллаж байна.

Анхны ингэний ферм болох “Солид партнерс групп” 225 ингэтэй. Нэг ингэнээс дунджаар 2.5 литр сүү саадаг бөгөөд зуны улиралд 4 литрт хүрдэг. Ингэний сүүгээр тэжээллэг ундаа, тараг, хуурай сүү зэрэг найман төрлийн бүтээгдэхүүн үйлдвэрлэн иргэдэд нийлүүлж байна.

Эх сурвалж: https://www.montsame.mn/