Монгол Улс болон Евразийн эдийн засгийн холбоо (ЕАЭЗХ)-ны хамтын ажиллагаа, тэр дундаа худалдааны эргэлтийг нэмэгдүүлэх асуудлууд гол байр суурийг эзэлж байна.
Монгол Улс болон Евразийн эдийн засгийн холбоо (ЕАЭЗХ), түүний гишүүн орнууд хоорондын худалдааны түр хэлэлцээрийг Монгол Улсын Их Хурлын 2025 оны намрын ээлжит чуулганаар (2025.12.12) соёрхон баталсан. Энэхүү хэлэлцээр хэрэгжиж эхэлснээр манай улсын экспортлогчдод гадаад зах зээлд өрсөлдөх бодит боломжууд нээгдэж байна.
Хэлэлцээрийн хамрах хүрээ:
Тус хэлэлцээрийн хүрээнд Монгол Улсаас ЕАЭЗХ-ны гишүүн орнууд болох:
Оросын Холбооны Улс
Бүгд Найрамдах Казахстан Улс
Бүгд Найрамдах Беларусь Улс
Бүгд Найрамдах Армени Улс
Бүгд Найрамдах Киргиз Улс руу экспортлох 367 нэр төрлийн бараанд гаалийн тарифын хөнгөлөлт болон чөлөөлөлт эдлэх боломж бүрдэж байна.
Хөнгөлөлтөд багтсан бараа бүтээгдэхүүнүүд:
Хэлэлцээрт тусгагдсан, тарифын хөнгөлөлт эдлэх барааны жагсаалтад дараах салбарын бүтээгдэхүүнүүд багтсан болно. Үүнд:
Хөдөө аж ахуй, хүнсний бүтээгдэхүүн: Мах, махан бүтээгдэхүүн, хүнсний үйлдвэрлэлийн бүтээгдэхүүн;
Хөнгөн үйлдвэр: Ноос, ноолуур, нэхмэл болон оёмол бүтээгдэхүүн;
Мал аж ахуйн гаралтай бүтээгдэхүүн: Арьс шир болон зарим боловсруулах үйлдвэрийн бүтээгдэхүүнүүд.
Энэхүү түр хэлэлцээр нь Монгол Улсын үйлдвэрлэгчдэд 180 гаруй сая хэрэглэгчтэй Евразийн зах зээлд татварын таатай нөхцөлөөр нэвтрэх, улмаар гадаад худалдааны тэнцвэрийг хангах, үндэсний үйлдвэрлэлийг дэмжихэд стратегийн өндөр ач холбогдолтой юм.
Эх сурвалж: https://www.mongolchamber.mn/