Дорнод аймгийн хэмжээнд 25 иргэн, ААН зөгийн аж ахуй эрхэлдэг. Зөгийчид жилд 1500 орчим бүл зөгийнөөс 40-өөд тонн зөгийн бал хураан авч байна. Тэдний нэг төлөөлөл бол М.Сарангарав.
Эдний гэр бүлийн зөгийн аж ахуй Дорнод аймгийн Халхгол сумын Цогтсүмбэр багийн нутагт байдаг. Тавин бүл зөгийнөөсөө жилд 1-2 тонн бал хураан авч, “Маршал” зөгийн бал нэртэйгээр зах зээлд гаргаж байна. Сав, баглаа боодлын хувьд чамин тансаг учраас сар шинээр холоос ирж буй зочиддоо бэлэглэхээр сонголтоо хүмүүс худалдан авах нь их байна. Өмнө нь Томокогийн зөгийн балны үйлдвэрт нийлүүлдэг байсан бол энэ жилээс өөрийн нэр шошго, сав баглаа боодолтойгоор зах зээлд нийлүүлж эхэлжээ.
Сонирхуулахад, 1-2 хоногтой ажилчин зөгий хамт төрсөн “дүү” өндөгнүүдээ дулаан байлгах, 3-5 хоногтой нь том авгалдайнуудыг, 6-11 хоногтой нь жижиг авгалдайнуудыг хооллох үүрэг хүлээдэг. Харин 12-17 хоногтой нь давирхай гарган сархинаг барьж хүнс зөөнө. 18-21 хоногтой зөгий үүрээ гадны халдлагаас хамгаалдаг бол түүнээс дээш настай зөгийнүүд 40-45 нас хүрч үхэх хүртлээ үүрнээсээ гарч цэцгийн тоос тоосонцор, бал, ус цуглуулан тоос хүртээх зэрэг ажил хийдэг.
