Өнгөрсөн амралтын өдрүүдээр болсон “Цагаан сар-2026” үзэсгэлэн худалдаагаар 321 сая төгрөгийн борлуулалт хийсэн байна.

Үзэсгэлэн худалдаанд 15 сумын 201 аж ахуйн нэгж, иргэн арьс ширэн эдлэл, ноосон бүтээгдэхүүн, мах, махан бүтээгдэхүүн, сүү, цагаан идээ, гурилан бүтээгдэхүүн, жимс, хүнсний ногоо, даршилсан бүтээгдэхүүн, модон бүтээгдэхүүн, бэлэг дурсгал гэх зэрэг төрөл бүрийн бараагаар оролцжээ.

Үүнээс Улаангом сумын 14 аж ахуйн нэгж, 5 хоршоо, 97 иргэн нийт 196.5 сая төгрөгийн бараа бүтээгдэхүүн борлуулсан бол үлдсэн орлого нь бусад 14 сумын оролцогчдоос бүрджээ.

Энэ үеэр бүтээгдэхүүний сав баглаа боодол, нөөц, борлуулалт зэрэг үзүүлэлтэд үндэслэн таван төрлөөр шилдгүүдийг шалгаруулан шагнаж урамшууллаа.

• Аймгийн шилдэг үйлдвэрлэгч, ХАҮТ-ын Гран при шагналыг “Дөрвөн булаг Увс” компанийн “Хонины ноосон хөнжил”
• Сүү, сүүн бүтээгдэхүүний төрөлд: Давст сумын “ГАЭС” хоршооны “Хэвийн ааруул”
• Мах, махан бүтээгдэхүүний төрөлд: Улаангом сумын “Оргил Увс” компанийн “Тансаг ветчина” хиам
• Гурилан бүтээгдэхүүний төрөлд: Улаангом сумын “Арвай” цехийн “Хэвийн боов”
• Оёмол бүтээгдэхүүний төрөлд: Улаангом сумын иргэн Х.Батхишигийн “Монгол дээл” шалгарч өргөмжлөл, мөнгөн шагнал хүртлээ. 

Үзэсгэлэн худалдааг аймгийн ХХААГ, Төрийн банкны Увс аймаг дахь салбар зэрэг байгууллага хамтран зохион байгуулсан юм.