Хөвсгөл аймгийн Тариалан сумын “Алтан хажир” ХХК-ийн ерөнхий агрономич Б.Лхагва-Очир Улсын аварга тариаланч цол, тэмдгээр шагнууллаа.
Шагналыг УИХ-ын дэд дарга Ж.Бат-Эрдэнэ, аймгийн Засаг даргын орлогч Ц.Гансүх болон сумын удирдлагууд гардуулан өглөө.
Б.Лхагва-Очир нь “Хөвсгөл Алтандуулга” ХК-ийн охин компани “Алтан хажир” ХХК-д ерөнхий агрономич, операторчноор 20 дахь жилдээ тасралтгүй ажиллаж байна.
Энэ хугацаанд газар тариалан, хөдөө аж ахуйн үйлдвэрлэлд орчин үеийн дэвшилтэт техник, технологийг үе шаттай нэвтрүүлж, үйлдвэрлэлийн үр ашиг, бүтээмжийг нэмэгдүүлэн ажиллаж байгаа юм.
Түүний санаачилга, зохион байгуулалтын үр дүнд тариалалтын талбайн ашиглалт сайжирч, уринш, хагалгааны ажил тогтмол нэмэгдэн, эргэлтийн талбайг бүрэн ашиглах боломж бүрдэн жил бүр га-гаас 12-20 центнер ургац хураан авч, ургацын хэмжээ, чанарыг тогтвортой өсгөж байна.
Мөн шинэ сортын туршилт, нутагшуулалтыг амжилттай хэрэгжүүлснээр тариалалтын чанарыг ахиулж, стратегийн гол нэрийн хүнс болох гурил, тэжээлийн үйлдвэрлэлийн чанарыг сайжруулжээ.
Тэрбээр зөвхөн үйлдвэрлэлийн амжилтаар зогсохгүй, залуу мэргэжилтнүүдийг сургаж дадлагажуулах, мэдлэг туршлагаа хуваалцах үйлсэд идэвхтэй оролцож, хамт олноо манлайлан ажиллаж байна.
Эх сурвалж: https://montsame.mn/