Монгол Улс энэ оны нэгдүгээр сард 105 улстай худалдаа хийж, гадаад худалдааны бараа эргэлт 2.6 тэрбум ам.доллар боллоо.
Үүнээс экспорт 1.7 тэрбум, импорт 843.0 сая ам.доллар болж, төлбөрийн тэнцэл 906.5 сая ам.долларын ашигтай гарсныг Үндэсний статистикийн хороо мэдээлэв.
Нийт бараа эргэлтийн хэмжээ өмнөх оны мөн үеийнхээс 30.7 хувь буюу 608.9 сая, экспорт 71.6 хувь буюу 730.2 сая, тэнцэл 16.5 дахин буюу 851.5 сая ам.доллароор нэмэгдэж, импорт 12.6 хувь буюу 121.3 сая ам.доллароор багасжээ.
Экспорт нэмэгдэхэд зэсийн хүдэр ба баяжмал 462.3 сая, нүүрс 167.6 сая, боловсруулаагүй буюу хагас боловсруулсан алт 95.5 сая, лаазалсан махан бүтээгдэхүүн 8.3 сая ам.доллароор өссөн нь нөлөөлжээ. Харин жоншны хүдэр ба баяжмал 15 сая, цайрын хүдэр болон баяжмал 6 сая, боловсруулаагүй газрын тос 5.6 сая, молибдений хүдэр, баяжмал 2.5 сая ам.доллароор багассан байна.
Импорт өмнөх оны мөн үеийнхээс багасахад суудлын автомашин 73.1 сая, ачааных 36.1 сая, тээврийн хэрэгслийн сэлбэг, эд анги 17.6 сая, дизелийн түлш 13 сая, бульдозер, экскаватор 7.5 сая ам.доллароор буурсан нь нөлөөлжээ. Харин автобензин 26.8 сая, азотын бордоо 5.8 сая, тунгаар савласан эм 3.5 сая ам.доллароор нэмэгдсэн байв.
Түүнчлэн, экспорт энэ оны нэгдүгээр сард өмнөх сарынхаас 11 хувь буюу 215.2 сая, импорт 23.8 хувь буюу 263.9 сая ам.доллароор тус тус багаслаа. Экспортын 96.7 хувийг эрдэс бүтээгдэхүүн, үнэт чулуу, металл гоёлын зүйлс, үндсэн төмөрлөг, харин импортын 72 хувийг эрдэс бүтээгдэхүүн, машин механик төхөөрөмж, цахилгаан болон тээврийн хэрэгсэл, тэдгээрийн эд анги, үндсэн төмөрлөг, түүгээр хийсэн бүтээгдэхүүн эзэлжээ.
Эх сурвалж: 1212.mn