Өмнөговь аймгийн Ханхонгор сумын нутагт Монголын анхны ингэний ферм тав дахь жилдээ үйл ажиллагаагаа тогтвортой явуулж байна.
Ингэний сүүний ферм одоогоор 225 тэмээтэйгээс 160 нь ингэ бөгөөд өнөөдрийн байдлаар 75 ингийг сааж, өдөрт 150 литр сүүг өөрийн үйлдвэрт нийлүүлж байна.
Ингэний сүүгээр найман нэр төрлийн бүтээгдэхүүн үйлдвэрлэж, орон нутгийн болон Улаанбаатар хотын зах зээлд нийлүүлэн борлуулж байна.
“Солид партнерс” ХХК-ийн захирал Б.Цэнд-Аюуш:
Манай ингэний сүүний ферм 2021 оноос ингэний сүүн бүтээгдэхүүн үйлдвэрлэж эхэлсэн бөгөөд үйл ажиллагаагаа тасралтгүй, тогтвортой өргөжүүлэн ажиллаж байна.
Өнөөдрийн байдлаар шингэн гурван төрөл, хуурай таван төрлийн бүтээгдэхүүн үйлдвэрлэн орон нутагтаа төдийгүй Улаанбаатар хотын сүлжээ дэлгүүрүүдээр борлуулж байна.
Манайх 20 гаруй ажилтантайгаар үйл ажиллагаа явуулж, ингэний сүү болон сүүн бүтээгдэхүүнээ дотоодын зах зээлд таниулахын зэрэгцээ гадаад зах зээлд экспортлох зорилго тавин ажиллаж байна.
Манай ингэний сүүний фермийг түшиглэн бусад томоохон сүүний үйлдвэр, компаниуд хамтран “Сүүний кластер” байгуулсан.
Кластер бүтээгдэхүүнийг экспортод гаргахад шаардлагатай бичиг баримтыг бүрдүүлэх, холбогдох зөвшөөрөл, гэрчилгээг авах ажлыг хийж байна. Түүнчлэн тэмээ бүхий аймгуудын тэмээчдэд сургалт, зөвлөгөө өгч, ингэний сүү бэлтгэн нийлүүлэх нэгдсэн тогтолцоог бүрдүүлэхээр зорин ажиллаж байна.
Хэрэв ингэний фермээ улам хөгжүүлж чадвал экспортын суурь бүрдэж, томоохон ахиц гаргах боломжтой юм.
Бид одоогоор ингэнээс дунджаар өдөрт 2,1 литр сүү авч байгаа нь бэлчээрийн тэмээнээс хоёр дахин их үзүүлэлт юм. Ферм дээр хийсэн туршилтаар нэг монгол ингэнээс өдөрт 6 литр сүү сааж авсан амжилт гаргасан хэдий ч, дундаж хэмжээнд одоогоор энэ түвшинд хүрээгүй байна.
Цаашдаа тэжээлийн судалгааг сайн хийж, тав тухтай байдлыг сайжруулах замаар сүүний өгөөжийг нэмэгдүүлэх боломжтой болохыг бид харсан.
Тиймээс борлуулалт болон бэлтгэл хяналтын сүлжээг зэрэг хөгжүүлэх шаардлагатай байна. Бид одоогоор бэлтгэл хэсэг дээр ажиллаж, туршлага судалж байгаа.
Монгол Улсад 60 мянга гаруй ингэ бий бөгөөд үүнээс зөвхөн дөрвөн мянгыг нь сааж, дотоодын зах зээлд нийлүүлж байгаа нь судалгаа бий. Тэгэхээр малчид болон хэрэглэгчдэд сургалт, сурталчилгааг сайтар явуулж, ингэний сүүний ашиг тусыг таниулан байнгын хэрэглэгч бий болгосноор нийлүүлэлт нэмэгдэж, үйл ажиллагаа тогтворжих юм. Үүний үр дүнд бүтээгдэхүүнээ гадаад зах зээлд гаргах боломж бүрдэнэ.
Эх сурвалж: https://www.montsame.mn/