Завхан аймаг хүн амынхаа махны хэрэгцээний 98.7 хувийг дотоодоосоо хангаж байна.
Ерөнхийлөгчийн санаачлан хэрэгжүүлж буй “Хүнсний хувьсгал” үндэсний хөдөлгөөний хүрээнд таван жилийн төлөвлөгөө боловсруулан ажиллаж байгаа бөгөөд дотоодын махны үйлдвэрүүд мах боловсруулж зах зээлд борлуулж байна.
Аймагт “Завхан хүнс” групп, “Саян ундарга” ХК, “Нисэх агро” ХХК, “Сэцэн Агро” ХХК, “Тэс шим” хоршоо зэрэг 5 аж ахуйн нэгж мах боловсруулах чиглэлээр үйл ажиллагаа явуулж байна. Эдгээр аж ахуйн нэгжүүд дотооддоо 243.6 тн мах боловсруулж, 1930 тн махыг экспортод гаргасан байна.
“Тэс-Шим” хоршооны үйлдвэр нь үечилсэн ажиллагаатай, малын мах бэлтгэж байна. Хоногт хонь 180 толгой, ямаа 120 толгой, адуу 50-70 толгойг төхөөрөх хүчин чадалтай. Дайвар түүхий эдээ Улаанбаатар хотын дайвар түүхий эдийн үйлдвэрт нийлүүлдэг. “Сэцэн агро” ХХК үечилсэн ажиллагаатай, малын мах бэлтгэдэг. Хоногт бод 30 толгой, бог 120 толгой төхөөрөх хүчин чадалтай. Ихэвчлэн гулуузаар бэлтгэж, дайвар түүхий эдээ Улаанбаатар хотод борлуулдаг.
“Завхан хүнс” групп нь үечилсэн ажиллагаатай, малын мах бэлтгэдэг. Хоногт бод 200 толгой, бог 1000 толгойг төхөөрөх хүчин чадалтай. Дайвар түүхий эдээ дотооддоо буюу аймагтаа борлуулдаг.
2025-2026 онд аймгийн хэмжээнд 207.5 мянган толгой мал хүнсэнд, 493.5 мянган толгой мал буюу нийт малын 30 хувийг зах зээлд нийлүүлэх урьдчилсан судалгаа гарсан. Өнөөдрийн байдлаар 207.4 мянган толгой малыг хүнсэнд хэрэгцээлж 493.5 мянган толгой малыг зах зээлд нийлүүлсэн тухай Завхан аймгийн ЗДТГ-аас мэдээлэв.
Эх сурвалж: https://montsame.mn/mn/