Завхан аймагт үйл ажиллагаа явуулдаг “Мөнхөд мандаг” ХК-ийн үйлдвэрлэж буй “Тамир” нэрийн дархлаа дэмжих өтгөрүүлсэн шүүс орон нутагтаа эрэлт ихтэй бүтээгдэхүүн болжээ.
Тус компанийн захирал Б.Мөнх-Алдарын мэдээлснээр өнгөрсөн сар шинийн баярын өдрүүдэд “Тамир” шүүс борлуулалтаараа тэргүүлжээ.
МҮХАҮТ-ын Завхан салбар орон нутгийн үйлдвэрлэгчдийн бараа бүтээгдэхүүнийг борлуулах албан ёсны цахим платформыг нэвтрүүлснээр, орон нутгийн бүтээгдэхүүнүүдийг хаанаас ч цахимаар захиалах боломжтой болжээ. Уг платформоор хамгийн их борлуулалттай бүтээгдэхүүн нь байгалийн зэрлэг жимсээр хийсэн шүүс болохыг онцоллоо.
“Мөнхөд мандаг” ХК өнгөрсөн онд “Тамир” нэрийн өтгөрүүлсэн шүүсийг зах зээлд нэвтрүүлсэн бөгөөд орон нутагт ургадаг байгалийн зэрлэг жимсийг ашиглан гурван төрлийн бүтээгдэхүүн үйлдвэрлэж байна. Чацаргана, нэрс, аньс, чонын элэг орцтой энэхүү шүүс нь дархлаа дэмжихээс гадна эмчилгээний зориулалтаар хэрэглэх боломжтой бөгөөд өвөл, хаврын улиралд ханиад, томууны үед хэрэглэхэд тохиромжтой бүтээгдэхүүн юм.
Үндэсний шилдэг үйлдвэрлэгчдийн нэг гэгддэг тус үйлдвэр орон нутагт хүнсний үйлдвэрлэл, худалдааны чиглэлээр үйл ажиллагаа явуулж, 50 орчим нэр төрлийн бүтээгдэхүүн үйлдвэрлэдэг. Бүтээгдэхүүнүүдээ байгалийн цэвэр, органик гаралтай түүхий эдээр хийдэг бөгөөд нэрс, үхрийн нүд, чацаргана зэрэг амин дэмээр баялаг зэрлэг жимс, мөн сүү, цагаан идээг ашигладаг байна.
Тус компани сүү, цагаан идээгээ өөрсдөө боловсруулж, ааруул, аарц, тараг, ээзгий зэрэг уламжлалт бүтээгдэхүүнийг үйлдвэрийн аргаар савлан хэрэглэгчдэд хүргэдэг. Мөн уламжлалт аргаар шимийн архи нэрж, үйлдвэрийн аргаар савлан худалддаг. Үхрийн болон ямааны борцыг ч мөн үйлдвэрийн аргаар савлаж, жилийн дөрвөн улиралд шинэ цагаан идээ хэрэглэх боломжийг орон нутагтаа бүрдүүлжээ.
Жилд дунджаар 10 тонн архи, шүүс, 20 тонн дарс, 7 орчим тонн цай (ээзгийтэй, ургамлын, сульхиртай) үйлдвэрлэдэг бол чацарганы тосыг бага хэмжээгээр гаргадаг. Мөн чонын элэг, аньс, нэрс, гишүүнэ, хүрэн манжингийн чанамлыг жилд 30 гаруй тонн үйлдвэрлэн зах зээлд нийлүүлж байна.
Завхан аймагт ирсэн зочид, төлөөлөгчдөд барьдаг бэлэг, брэнд бүтээгдэхүүн болдгоороо онцлог. Аймгийнхаа хэрэглэгчдийн хэрэгцээг хангахаас гадна хөрш зэргэлдээ аймгууд, нийслэл Улаанбаатар, Эрдэнэт, Дархан хотын хэрэглэгчдэд Номин холдингийн сүлжээгээр дамжуулан хүргэж байна.
Эх сурвалж: https://montsame.mn/mn/