Аймгийн нөөцөд хадгалагдаж буй өвс, тэжээлийг малчдад олгохоор шийдвэрлэжээ. УИХ-ын дарга Н.Учрал өнгөрсөн долоо хоногт Дархан-Уул аймагт ажиллахдаа иргэдтэй уулзаж, малчдын өвс, тэжээл дууссан асуудлыг сонсож, аймаг, сумдын нөөцөөс олгох хүсэлтийг Засаг даргад уламжилсан байна.
Аймгийн Онцгой комиссын шийдвэрийн дагуу сумдад өвс, тэжээл олгох ажлыг маргаашаас эхлүүлнэ. Орхон суманд 2024 онд бэлтгэсэн 80 тн өвсний 60 тн, Шарын гол, Орхон суманд тус бүр 10 тн өвсийг үнэгүй олгохоор болжээ. Мөн 2023 онд бэлтгэсэн өнжмөл өвсийг үнэ төлбөргүй олгох шийдвэрийг гаргаж, алслагдсан малчин өрхөд түлхүү олгохоор шийдвэрлэжээ.
Энэ жил их цас орсноос цагаанаар зудархуу байдал үүсэж, хаваржилт шилжих үед машин техник хүрэх боломж муу байгааг харгалзан үзжээ. Ингэхдээ өмнөх жилүүдэд олгодог байсан 5-6 боодлыг нэмэгдүүлж, 30–50 боодол өвс хуваарилах юм.
Сумд жил бүр аюулгүйн нөөцөд өвс бэлтгэдэг. Дархан сум нийт өвсний 80 хувийг, Хонгор болон Орхон сум 90 хувийг, Шарын гол сум 80 хувийг зарцуулжээ. Тэжээлээс Дархан сум 25 тн үлдсэн бол Хонгор сум 80 тн, Орхон 14 тн, Шарын гол 24.9 тн тэжээлийг малчдад тараасан байна.
Ташрамд 2025 онд бэлтгэсэн өвс, тэжээийг зах зээлийн үнийн судалгаа гаргаж, малчдын эрэлт хэрэгцээнд тулгуурлан аймгийн Онцгой комиссын хуралдаанаар хэлэлцүүлэн үнэ тогтоож нийлүүлэх юм.
Эх сурвалж: Монцамэ агентлаг
