Азидаа хамгийн том хүнсний үзэсгэлэн болох 51 дахь удаагийн FOODEX Japan 2026 Япон улсын Токио хотноо “Big Sight” үзэсгэлэнгийн төвд /2026.03.10/ нээлтээ хийлээ. Нээлтэд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Монгол Улсаас Япон Улсад суугаа Онц бөгөөд Бүрэн эрхт Элчин сайд Б.Баярсайхан, Жижиг, дунд үйлдвэрийн газрын дарга Я. Эрдэнэсайхан нар оролцлоо.
Энэхүү олон улсын үзэсгэлэн, арга хэмжээнд Монгол улсаас найман аж ахуйн нэгж эх орныхоо онцлог бүтээгдэхүүнийг дэлхийн зах зээлд танилцуулахаар амжилттай оролцож байна.
Ингэхдээ үндэсний үйлдвэрлэгчид Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний дотоодын хүнсний хэрэгцээг хангах, цаашлаад бүс нутагтаа хүнс экспортлогч улс болох зорилтын хүрээнд олон улсын экспо, үзэсгэлэнд тогтмол оролцож бүтээгдэхүүнээ танилцуулж байгаа юм.
Мөн монголын 50 гаруй баялаг бүтээгчид тус үзэсгэлэнг үзэж, туршлага судалж байна.
Монгол улсаас:
- “Монос хүнс” ХХК (Чацарганы бүтээгдэхүүн, барагшуунтай бүтээгдэхүүн)
- “Боса Кондитер ХХК (SHI-RA шар сүүний амттан)
- “Арвайн Үндэс” ХХК (Khan, Chass шар айраг, Соёлт, Sayan, Aurora wave архи)
- “Булган Мах Маркет” ХХК (Адууны мах)
- “Цайдам Трейд” ХХК (Бурамхан брэнд, Ингэний сүүтэй чихэр)
- “Төгс Уураг” ХХК (Хөлдөөж хатаасан тараг)
- “Есөн од” ХХК (Шоколад)
- “Шидэт хүнс” ХХК (Баяжуулсан жигнэмэг) зэрэг бүтээгдэхүүнээрээ оролцож байна.
Монголын хүнсний салбарын экспортын боломжийг өргөжүүлж, дэлхийн худалдааны төвшинд өрсөлдөхүйц чанар, өв соёлыг харуулж буй үндэсний үйлдвэрлэгчдэдээ амжилт хүсье!
