Аймгийн хүн амын хаврын улирлын махны хэрэгцээнд зориулан нөөцийн махыг энэ сарын 15-наас худалдаанд гаргана. Энэ жил 102 тонн мах нөөцөлж бэлтгэсэн бөгөөд эхний ээлжид 30 хувийг худалдаанд гаргахаар төлөвлөжээ.
Өнөөдөр аймгийн Засаг даргын орлогчоор ахлуулсан ажлын баг нөөцийн мах бэлтгэж буй “Дархан эрдэнэ мах комбинат” ХХК-д төлөвлөгөөт шалгалт хийлээ. Нөөцийн махны чанар, аюулгүй байдал, хадгалалт, тээвэрлэлт, савлагаанд ХХААГ тогтмол хяналт тавьж байна.
Нян, бактери судлал, үхсэн, өвчтэй малын махыг ялган тодорхойлох зэрэг эрүүл ахуйн шинжилгээг аймгийн Мал эмнэлгийн лабораторид хийж дуусгасан бөгөөд ямар нэгэн зөрчил илрээгүй гэдгийг Мал эмнэлгийн албанаас мэдээллээ.
Стандартын дагуу савлаж бэлтгэсэн үхэр, хонь, ямааны махыг 39 гэрээт хүнсний дэлгүүрээр борлуулахаар төлөвлөсөн бөгөөд эхний ээлжид 17 хүнсний дэлгүүртэй гэрээ байгуулахад бэлэн болсон байна. Ингэхдээ нэг багт 1-2 хүнсний дэлгүүр байх юм. Үнийн хувьд үхрийн махыг 1 кг-ыг 16300, хонины махыг 1 кг-ыг 14800, ямааны махыг 1 кг-ыг 11200 төгрөгөөр худалдана.
