Татварын багц хуулийн шинэчлэлээр нийт 2.7 их наяд төгрөгийн татварын ачааллыг үе шаттай багасгана.
Ингэхдээ иргэдийн татварын ачааллыг 2 их наяд, аж ахуйн нэгжийн татварын ачааллыг 700 тэрбум төгрөгөөр багасгахаар тооцсоныг Сангийн яам Татварын ерөнхий газар хамтран “Татварын багц хуулийн шинэчлэл”-ийн талаар зохион байгуулсан уулзалтын үеэр мэдээлэв.
Шинэчилсэн хуулийн төсөлд аж ахуйн нэгжийн орлогын татварын шатлалыг шинэчилж, 6-10 тэрбум төгрөгийн орлогод 15 хувь, 10 тэрбум төгрөгөөс дээш орлогод 25 хувийн татвар ногдуулна. Жижиг, бичил бизнесийн хялбаршуулсан татварын босго 400 сая төгрөг болж, 1 хувийн татвар төлөх боломж бүрдэх юм.
Мөн жижиг дунд аж ахуйн нэгжийн татварын 90 хувь нь буцаалт авах босго 2.5 тэрбум төгрөг болж, өртэй байгууллагын банкны дансанд ирээдүйд орох орлогын 20 хувийг битүүмжлэхгүй үлдээн, гааль дээр НӨАТ-ыг 2 сар хүртэл хойшлуулж төлөх, тайлан залруулах хугацааг 1-2 жилээр сунгах боломжтой болох юм.
Иргэдэд сарын 500 мянган төгрөг хүртэлх худалдан авалтад төлсөн НӨАТ-ыг 100 хувь, 500 мянгаас 1 сая төгрөгт 50 хувь, 1 саяас дээш бол 20 хувийн буцаан олгохоос гадна хөдөлмөр эрхэлж буй бүх иргэдийн сарын 500 мянган төгрөг хүртэлх орлогыг 100 хувь хөнгөлнө. Мөн орон нутагт анх удаа болон эрчим хүчний хэмнэлттэй орон сууц худалдан авсан иргэдэд 15 сая хүртэл төгрөгийн татварын хөнгөлөлт олгох аж.
Эх сурвалж: Монцамэ агентлаг
