Төсвийн тогтвортой байдлын зөвлөлөөс “Монгол Улсын 2027–2029 оны дунд хугацааны төсвийн хүрээний мэдэгдэл боловсруулахад ашиглах макро эдийн засгийн үндсэн үзүүлэлт, төлөв байдлын таамаглалын тайлан”-гийн үр дүнг танилцуулав.
Төсвийн тогтвортой байдлын зөвлөлийн гишүүн Н.Ууганбаатар улсын эдийн засгийн нөхцөл байдал, макро эдийн засгийн дунд хугацааны төлөв, түүнд нөлөөлөх эрсдэл, бодлогыг танилцуулахдаа, тайланг гадаад эдийн засаг, геополитикийн нөхцөл байдал, уул уурхайн бүтээгдэхүүний үнэ, эрэлт, Монгол Улсын макро эдийн засгийн нөхцөл байдлын шинжилгээ, макро эдийн засгийн загварын таамаглалд үндэслэсэн гэлээ. Мөн гадаад орчны тодорхойгүй болон геополитикийн байдал, БНХАУ-ын эдийн засгийн өсөлтийн сааралт, түүхий эдийн үнийн хэлбэлзэл нь Монгол Улсын эдийн засгийн өсөлт, гадаад худалдаа, төсвийн орлогын төлөвт эрсдэл үүсгэж болзошгүйг тэмдэглээд, нүүрсний зах зээл, экспортын орлогын тогтворгүй байдал нь дунд хугацаанд анхаарах гол асуудал гэдгийг онцолсныг УИХ-ын ХМОНХГ-ын мэдээлэв.
Төсвийн дунд хугацааны байдалд нөлөөлж буй эрх зүйн орчны өөрчлөлт, зарлагын өсөлтөд анхаарах шаардлагатай. Тодруулбал, Монгол Улсын 2025 оны эдийн засгийн дотоод өсөлт ахисан ч энэ нь дунд хугацаанд тогтвортой үргэлжлэх боломж хязгаарлагдмал тул төсвийн бодлогыг хэрэгжүүлэхдээ гадаад, дотоод орчны эрсдэлийг харгалзан, төсвийн зарлагын өсөлтийг нэмэхгүй байх, томоохон төсөл, хөтөлбөрийн санхүүгийн эх үүсвэрийг бодитой тооцох, төсвийн төлөвлөлтийг хөгжлийн бодлоготой уялдуулах шаардлагатайг Төсвийн тогтвортой байдлын зөвлөл мэдэгдлээ.
Мөн дунд хугацаанд төсвийн бодлогыг хэрэгжүүлэхдээ төсвийн зарлагын ДНБ-ий эзлэх хувь, төсвийн алдагдлыг багасгах бодлогыг үргэлжлүүлэх, хөрөнгө оруулалтыг эрэмбэлэх, үр ашгийг дээшлүүлэх, дэс дараалал бүхий бодлоготой уялдуулах, төр-хувийн хэвшлийн хамтын ажиллагааг дэмжих, төсвийн мөчлөг сөрсөн бодлогыг хэрэгжүүлэх, татварын болон ашигт малтмалын эрх зүйн орчны өөрчлөлтийн нөлөөллийг харгалзан үзэх шаардлагатай гэж зөвлөжээ.
Түүнчлэн Монгол Улсын макро эдийн засгийн бодлого, төсвийн тогтвортой байдлыг хангах хүрээнд боловсруулсан дунд хугацааны макро эдийн засгийн таамаглал, бодлогын зөвлөмжийг холбогдох төрийн захиргааны төв байгууллагад хуульд заасан хугацаанд хүргүүлжээ.
Эх сурвалж: Монцамэ агентлаг