Энэ сарын 13-ны өдөр “ТАЛ ГАЗРЫН АМТ” ногоочдын холбооноос санаачлан “Тал нутгийн ногоочид – 2026” зөвлөлдөх уулзалтыг зохион байгууллаа.
Уулзалтад Дорнод аймгийн Засаг дарга Ш.Ёл болон Баян-Уул, Дашбалбар, Цагаан-Овоо, Хөлөнбуйр, Чулуунхороот, Баянтүмэн, Чойбалсан, Гурванзагал, Хэрлэн сумдын 250 гаруй төмс, хүнсний ногоо тариалан эрхлэгчид оролцож, салбарын хөгжил, төрөөс хэрэгжүүлж буй бодлого, хөтөлбөрүүдийн мэдээллийг солилцож, зээлийн батлан даалтын сангийн Зүүн бүсийн салбар болон арилжааны банкууд оролцож, газар тариалангийн салбарын зээл, санхүүжилт, ногоон зээлийн боломжуудын танилцуулаа.
Дорнод аймаг 96.7 мянган.га тариалангийн зориулалт бүхий талбайг 13 иргэн, 43 хуулийн этгээд эзэмшиж нийт талбайн 58,3% эргэлтэд оруулан ашиглаж байгаа юм. Үүнээс төмс хүнсний ногооны үйлдвэрлэл эрхлэгч 40 гаруй аж ахуй нэгж, хоршоо, бүлэг, 1278 өрхийн тариаланчид 352 га-д төмс, хүнсний ногоо тариалан жилд дунджаар 2841,1 тонн ургац хараан авч төмсний 44,2%, хүнсний ногооны 22,4%-ийг дотоодоосоо тус тус хангаж байна.
Аймгийн Засаг дарга Ш.Ёл “Дорнод аймгийн тэргүүлэх 3 чиглэлийн нэг болох хөдөө аж ахуйн салбарыг бодлогын түвшинд яамтай хамтран ажиллаж, хөгжүүлэхэд анхаарна.
Тухайлбал. Хүнс, хөдөө аж ахуй, хөнгөн үйлдвэрийн яамнаас салбарын хөгжлийг бүсчилсэн хөгжлийн бодлоготой уялдуулан энэ оноос “Орон нутгийн хөгжлийн төв” төслийг 21 аймгийн төв, 70 суманд байгуулахаар төлөвлөсөн. Энэхүү төв нь иргэд, малчид, тариаланчдад бизнесийн зөвлөх үйлчилгээ үзүүлэх, арьс шир, түүхий эдийн анхан шатны ангилан ялгалт хийх, сүү, цагаан идээ боловсруулах бага оврын үйлдвэр байгуулах, бод малын үржлийн нэгж, техник дундын үйлчилгээ үзүүлэх зэрэг цогц үйлчилгээг нэг дороос авах боломж бүрдэнэ.
Дорнод аймгийн хувьд хүн амын төвлөрөл ихтэй, төмс, хүнсний ногоо тариалах боломжтой сумдад “Агро парк” байгуулах төслийг үе шаттайгаар хэрэгжүүлэх зорилт тавиад байгаа ба энэ онд Хэрлэн сумын 8 дугаар багт 100 га талбайг шийдвэрлэн 110,0 сая.төгрөгөөр цахилгаан дамжуулах агаарын шугам, 163,0 сая.төгрөгөөр техник тоног төхөөрөмж худалдан авах ажиллагааг эхлүүлээд байна.
Мөн тус байршилд Бүгд Найрамдах Солонгос Улсын “KD SALOR” компанитай хамтран 30 орчим тэрбум төгрөгийн төсөвт өртөгтэй сэргээгдэх эрчим хүчний эх үүсвэрээр шийдсэн ухаалаг хүлэмж бичил төслийг хэрэгжүүлэхээр бэлтгэл ажлыг хангаж байна.
Энэ онд Хүнс, хөдөө аж ахуй хөнгөн үйлдвэрийн сайд, Сангийн сайд нарын хамтарсан тушаалын хүрээнд 520 сая.төгрөгийн санхүүжилтээр хүлэмж нийлүүлэгдэхээр төлөвлөгдөн худалдан авах ажиллагааг зарлагдаад байна.
Мөн Хүнс хөдөө аж ахуй, хөнгөн үйлдвэрийн яамнаас олгох ЖДҮ-ийг дэмжих зээлийн олгох ба үүнд төмс, хүнсний ногоо тариалалт, агуулах, зоорь, хүлэмжийн аж ахуй, даршилсан хүнсний бүтээгдэхүүн үйлдвэрлэх гэсэн тодорхой салбаруудыг оруулах саналыг уламжлаад байна. Энэ жилийн хувьд санхүүжүүлэх эх үүсвэр 5 тэрбум төгрөг байхаар бодлогын яамнаас шийдвэрлэсэн. Энэ нь бидэнд хөдөө аж ахуйн үйлдвэрлэлийн гол салбар болох хүнсний үйлдвэрлэлийг нэмэгдүүлэх, өргөтгөх, чанаржуулах том боломж гэж харж байна.
Төсөл хүлээн авах ажил эхлэх бөгөөд бид та бүхэнд төслөө бэлтгэхээс эхлээд илгээх хүртэл зөвлөн туслах нэг цэгийн үйлчилгээ ажиллуулж дэмжиж ажиллахаа илэрхийлэв.
Эх сурвалж: Дорнод аймгийн ЗДТГ