“Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах “Зөвлөлдөх уулзалт” Завхан аймагт боллоо.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд улс даяар хийгдэж буй үйл ажиллагаа, дэвшүүлж буй зорилтууд, үр дүнгийн талаар танилцуулж, Завхан аймгийн ХХААГ-ын дарга Ч.Мөнххүрэл болон орон нутгийн хүнсний үйлдвэрлэл эрхлэгчид, баялаг бүтээгчидтэй санал солилцлоо.
Завхан аймагт “Хүнсний хангамж, аюулгүй байдал” үндэсний хөдөлгөөний хүрээнд олгосон бага хүүтэй, урт хугацаатай хөнгөлөлттэй зээлд 24 иргэн, аж ахуй нэгж хамрагдаж, дотоодын хүнсний хангамжаа өсгөжээ. Мөн ерөнхий боловсролын сургуулийн сурагчид болон байнгын асаргаа шаардлагатай зорилтот бүлгийн хүүхдүүдийн кальци, Д аминдэмийн дутагдлыг бууруулах, дархлааг дэмжих, өсөлт хөгжил, суралцах чадварыг сайжруулах зорилгоор “Сүү” зорилтот төслийг боловсруулах ажлын хэсгийг энэ оны хоёрдугаар сард байгуулжээ.
Тус ажлын хэсэг үйлдвэрлэл, хангамж, хүртээмж, чанар, аюулгүй байдлын талаарх судалгааг дөрөвдүгээр сарын 1-ний дотор нэгтгэн танилцуулах юм. Одоогийн байдлаар сүү, сүүн бүтээгдэхүүний хэрэгцээний 57 хувийг дотоодын үйлдвэрлэлээр хангаж байна.
Уулзалтын үеэр “Хүнсний хувьсгал” мэргэжлийн холбооны Завхан аймаг дахь салбар зөвлөлийн тэргүүнээр Завхан аймгийн “Жаргалтай хоршоо”-ны тэргүүн М.Батбаяр сонгогдлоо.
Тус холбоо нь орон нутгийн түвшинд хүнсний хангамжийн тогтвортой байдлыг хангах, төр-хувийн хэвшлийн түншлэлийг өргөжүүлэн, салбарын үйл ажиллагааг илүү зохион байгуулалттай, үр дүнтэй хэрэгжүүлэхэд чиглэсэн үйл ажиллагаа явуулах юм.
Хөдөлгөөний үр дүнд улаан хальст саримсны тариалалт, газар тариалангийн үйлдвэрлэл 3143.9 га буюу 47.9 хувиар өссөн байна. 2023 оноос эрчимжсэн мал аж ахуй эрхлэгчдийн тоо 10-аар, үхрийн тоо 321 толгойгоор, тахиа 5.7 мянган толгойгоор тус тус өсөж зах зээлд нийлүүлэх мах, сүү, өндөгний хэмжээ нэмэгдэж байна.
Махны үйлдвэрлэлийн хувьд аймаг дотоодын хэрэгцээний 98.7 хувийг хангаж байгаа бөгөөд мах боловсруулах чиглэлээр үйл ажиллагаа явуулж буй аж ахуйн нэгжүүд нийт 243.6 тонн мах боловсруулж, 1930 тонн махыг экспортод гаргажээ.
Ийнхүү “Хүнсний хувьсгал” хөдөлгөөний хүрээнд Завхан аймаг гол нэрийн хүнсний бүтээгдэхүүний дотоодын хангалтыг нэмэгдүүлж, хөдөө аж ахуй, газар тариалангийн салбарыг эрчимжүүлэн хөгжүүлэхэд тодорхой үр дүнд хүрч байна.
