Төрийн тэргүүний айлчлалын бизнес төлөөлөгчдийн багт монголын хүнс, хөдөө аж ахуй, хөнгөн үйлдвэр, худалдаа үйлчилгээ, уул уурхай, барилга, мэдээллийн технологи зэрэг салбарын 90 гаруй баялаг бүтээгч туршлага судалж байна.

Бизнес төлөөлөгчдийн багийг Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ахлан ажиллаж байна.

Энэ хүрээнд Агрофирма “Родина” хөдөө аж ахуйн бүстэй танилцлаа.

Казахстан улсын Акмолын мужид байрлах Агрофирма “Родина” нь 1961 онд байгуулагдсан, хөдөө аж ахуйн салбарын томоохон, олон чиглэл бүхий компани юм. Анх совхоз хэлбэрээр үйл ажиллагаагаа эхлүүлсэн тус байгууллага өнөөдөр орчин үеийн агрохолдинг болон өргөжиж, газар тариалан, мал аж ахуй, хүнсний үйлдвэрлэлийг цогцоор нь хөгжүүлж байна.

Тус компани 50 мянга орчим га талбайд үр тариа, тосны ургамал, хүнсний ногоо тариалж, элит үрийн аж ахуй эрхэлдэг. Мал аж ахуйн чиглэлээр сүүний чиглэлийн үхрийн аж ахуйг хөгжүүлж, жилд 8000 гаруй тонн сүү үйлдвэрлэх хүчин чадалтай. Мөн өөрийн сүү боловсруулах үйлдвэртэй бөгөөд төрөл бүрийн сүүн бүтээгдэхүүнийг дотоодын зах зээлд нийлүүлдэг.

Агрофирма “Родина” нь тэжээлийн үйлдвэр, үр боловсруулах цех, сэргээгдэх эрчим хүчний эх үүсвэр зэрэг дэд бүтцийг бүрдүүлсэн бөгөөд үйлдвэрлэлийн бүхий л үе шатыг нэг дор төвлөрүүлсэн онцлогтой. Жилийн үйлдвэрлэлийн хэмжээ хэдэн арван тэрбум төгрөгтэй тэнцэхүйц бөгөөд Казахстаны хүнсний аюулгүй байдалд чухал хувь нэмэр оруулж байна.

Өнөөдөр тус компани нь орчин үеийн техник, технологийг нэвтрүүлж, тогтвортой хөгжлийн жишиг болсон агробизнесийн нэг хэмээн үнэлэгдэж байна.

Тус аж ахуй нь зөвхөн үйлдвэрлэл эрхэлдэг төдийгүй ажилтан, иргэдийн амьдрах орчныг цогцоор нь шийдсэн жишиг суурин байгуулснаараа онцлог. “Родина” тосгонд сургууль, цэцэрлэг, спорт цогцолбор, соёл үйлчилгээний төв, орон сууц, инженерийн дэд бүтцийг бүрдүүлж, хөдөө орон нутгийн тогтвортой хөгжлийн загварыг бий болгосон байна.