“Баялаг бүтээгч бизнес аялал” 10 дахь жилдээ үргэлжилж, “Өлзий Хаалга” үйлдвэрийн үйл ажиллагаатай танилцлаа.
Бизнес аялалд “Жижиг, дунд үйлдвэрлэл үйлчилгээний холбоо”-ны Ерөнхийлөгч Ч.Даваабаяр, Дэд Ерөнхийлөгч Ц.Бумцэнд, Гүйцэтгэх захирал Б.Мөнхбаяр тэргүүтэй холбооны 60 гаруй баялаг бүтээгч, үндэсний үйлдвэрлэгчид оролцож байна.
Үндэсний үйлдвэрлэгчдээ дэмжих, харилцан туршлага солилцох, хамтын ажиллагааг өргөжүүлэх зорилготой “Баялаг бүтээгч” бизнес аялал 10 дахь жилдээ амжилттай зохион байгуулагдаж, энэ удаад холбооны гишүүд үндэсний үйлдвэрлэгч “Өлзий Хаалга” ХХК-ийн үйл ажиллагаатай танилцлаа.
Аяллын хүрээнд тус үйлдвэрийн үйлдвэрлэлийн дамжлага, технологийн шийдэл, бүтээгдэхүүний нэр төрөл, чанарын хяналтын тогтолцоотой танилцаж, импортыг орлох бүтээгдэхүүн үйлдвэрлэж буй туршлагаас судалсан юм. “Өлзий Хаалга” ХХК нь төмөр болон тусгай зориулалтын хаалга үйлдвэрлэлийн чиглэлээр үйл ажиллагаа явуулж, дотоодын зах зээлд үндэсний үйлдвэрлэлийн өрсөлдөх чадварыг нэмэгдүүлж буй баялаг бүтээгчдийн нэг билээ.
Үйлдвэр өдөрт 150-200 хүртэлх хаалга үйлдвэрлэх хүчин чадалтайгаар ажиллаж, захиалгат бүтээгдэхүүн үйлдвэрлэл, чанар, аюулгүй байдлын стандартыг хангах чиглэлд тогтвортой хөгжиж буйгаа танилцууллаа.
Бизнес аяллын үеэр холбооны гишүүд үйлдвэрлэлийн менежмент, инновац, зах зээлийн өрсөлдөөн, импорт орлох үйлдвэрлэлийг хөгжүүлэх боломжийн талаар санал солилцож, үндэсний үйлдвэрлэгчдийн хамтын ажиллагааг өргөжүүлэхийн чухлыг онцолсон юм.
10 дахь жилдээ зохион байгуулагдаж буй “Баялаг бүтээгч” бизнес аялал нь үйлдвэрлэгчдийг бодитоор холбож, туршлага солилцох, шилдэг жишгээ түгээх, үндэсний үйлдвэрлэлийн хөгжилд түлхэц өгөх үр дүнтэй арга хэмжээ болж байгаагаараа онцлогтой байна.
