Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хувьсгал” үндэсний хөдөлгөөний хүрээнд “Хүнсний үйлдвэрлэл, Технологийн их сургууль”-д ажиллалаа.

Тус сургууль нь хүнс технологийн салбарт эрэлттэй, чухал мэргэжлийн боловсон хүчин бэлтгэн “Хүнсний хувьсгал” үндэсний хөдөлгөөнд хувь нэмрээ оруулж байна.

Хүнс-Технологийн цогцолбор сургууль шаталсан сургалтын тогтолцоог бүрдүүлж, мэргэжлийн болон техникийн боловсролоос эхлээд бакалавр, магистр, докторын түвшний сургалтыг явуулдаг.

61 жилийн түүхт тус сургууль анх 1965 онд Хүнсний үйлдвэрийн ТМС нэртэйгээр үйл ажиллагаагаа эхэлж байсан ба өдгөө хөдөлмөрийн зах зээлд хамгийн их эрэлттэй байгаа мэргэжлүүдээр боловсон хүчин бэлтгэдэг, хүнс технологийн салбарын гол тулгуур болон хөгжжээ.

Иргэдийн хөдөлмөр эрхлэх ур чадварын хэрэгцээ, хөдөлмөрийн зах зээлийн эрэлт, ажил олгогчийн шаардлага, олон улсын түвшинд нийцүүлэн сургалтын чанарыг сайжруулах зорилттой тус сургууль нь эх орныхоо хүнсний үйлдвэр, үйлчилгээний салбарт 2500 гаруй дээд боловсролтой мэргэжилтэн, 3200 гаруй техник технологич, 25300 орчим мэргэжилтэй ажилтан бэлтгэн төгсгөсөн.

Хүнсний үйлдвэрлэлийн салбарт технологич, техникч мэргэжилтнүүдийн хомсдол бодит асуудал болоод байгаа энэ цаг үед оюутан, суралцагчдаа үндэсний манлай үйлдвэрүүдэд цалинтай дадлагажих, зөвхөн онол заах бус практик чадварт суурилан хөгжүүлдгээрээ онцлог юм.

Үйлдвэрлэлийн бодит орчинд мэргэжлийн ур чадвар эзэмшсэн суралцагч нар ажлын байранд шууд гарахад бэлэн, чадварлаг боловсон хүчин болон төгсдөг байна.