Цөлжилттэй тэмцэх НҮБ-ын конвенцын талуудын 17 дугаар бага хурлыг 2026 оны наймдугаар сарын 17-28-ны өдрүүдэд Монгол Улсад зохион байгуулах гэж байна.
Дэлхийн 190 гаруй орны 10 мянга орчим төлөөлөгч оролцох тус хурлын үеэр цөлжилт, газрын доройтол, ган, бэлчээр зэрэг хүн төрөлхтний өмнө тулгамдаж буй байгаль орчны асуудал, сорил, тэдгээрийг шийдвэрлэх, арга зам, шийдлийг хэлэлцэх юм.
Энэ хүрээнд Монгол Улсын Засгийн газраас 2026 оны дөрөвдүгээр сарын 15-ны өдөр тогтоолын хавсралтад өөрчлөлт оруулах тухай тогтоол баталлаа.
Тус тогтоолоор “Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хурал (COP17)-ын бэлтгэл ажлыг эрчимжүүлэх тухай” Засгийн газрын 2025 оны 07 дугаар сарын 30-ны өдрийн 36 дугаар тогтоолын хавсралтаар баталсан Үндэсний хорооны бүрэлдэхүүнд өөрчлөлт оруулан шинэчлэн баталжээ.
Уг шийдвэр нь Монгол Улсын олон улсын өмнө хүлээсэн үүргийн хэрэгжилтийг хангах, цөлжилт, газрын доройтолтой тэмцэх чиглэлээр хэрэгжүүлэх бодлого, үйл ажиллагааны уялдаа холбоог сайжруулах, COP17 бага хурлын бэлтгэлийг эрчимжүүлэхэд чиглэж байна.
Тус хурлыг зохион байгуулах Үйлчилгээ, хоол, хүнсний хангамж, эрүүл ахуйн дэд хорооны ажлын хэсэг байгуулагдан ажиллаж байна. Ажлын хэсгийн бүрэлдэхүүнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон холбогдох яам, агентлаг, тамгын газрын төлөөлөл багтжээ.
Тэд хурлын үеэр үйлчилгээ, хоол үйлдвэрлэл, хүнсний хангамж, эрүүл ахуй, аюулгүй байдлын бэлтгэл, зохион байгуулалтыг хангах чиглэлээр хамтран ажиллаж байгаа юм.
