Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Хөвсгөл аймагт мод тарих ажил 4 дүгээр сарын 30-наас 5 дугаар сарын 20-ны өдрийг хүртэл үргэлжилж байна.

Мөн Мөрөн хотын Чингүнжавын талбайд 5 дугаар сарын 15, 16-ны өдрүүдэд тарьц, суулгацын үзэсгэлэн худалдаа зохион байгуулна.

Тус үзэсгэлэн худалдаанд Хөвсгөл аймагт мод үржүүлгийн чиглэлээр үйл ажиллагаа эрхэлдэг 15 аж ахуйн нэгж, иргэн оролцож, олон төрлийн мод, бут сөөгийн тарьц, суулгац худалдана. Мөн мэргэжлийн байгууллагууд иргэдэд мод тарих, арчлан ургуулах талаар зөвлөгөө, мэдээлэл өгнө. Иймд иргэд, аж ахуйн нэгж, байгууллагуудыг тарьц, суулгацын үзэсгэлэн худалдаанд идэвхтэй оролцож, ногоон байгууламжийг нэмэгдүүлэхийг Хөвсгөл аймгийн Байгаль орчны газраас уриалж байна.

“Тэрбум мод” үндэсний хөдөлгөөний хүрээнд Хөвсгөл аймагт мод тарих, ургуулах чадавхыг бэхжүүлэх, зохион байгуулалт болон мэргэжил, арга зүйн удирдлагаар хангах, олон нийтэд экологийн боловсрол олгох, үр, тарьц, суулгацын нөөцийг бүрдүүлэх зорилгоор 2021-2030 онд нийт 20 сая мод тарьж ургуулах ажлыг хэрэгжүүлж байна.

Энэ хүрээнд энэ жил 2 сая гаруй мод тарьж ургуулах зорилт дэвшүүлэн ажиллаж байна.

Эх сурвалж: МОНГОЛЫН МЭДЭЭ – Montsame News Agency