Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний хүрээнд Төрийн худалдан авах ажиллагааны газраас үндэсний үйлдвэрлэгчид, баялаг бүтээгчдэд худалдан авалтын талаар танилцуулга мэдээлэл өгч, санал солилцлоо.

Сургалтад ТХААГ-ын дарга Ц.Батзул, “Хүнсний хувьсгал” мэргэжлийн холбооны Гүйцэтгэх захирал Б.Батцэцэг, Удирдах зөвлөлийн гишүүд оролцсон ба үндэсний үйлдвэрлэгчид төрийн худалдан авах ажиллагаанд оролцох явцад тулгамдаж буй асуудал, хүндрэлүүдийг ярилцаж, төр, хувийн хэвшлийн хамтын ажиллагааг сайжруулах чиглэлээр зөвлөлдөв.

Төрийн худалдан авах ажиллагааны газар хүнсний үйлдвэрүүдтэй хамтран 2027 оны нэгдүгээр сарын 1-ээс эхлэн дотооддоо үйлдвэрлэсэн, түүхий эд нь дотоодынхоо бүтээгдэхүүнд хамааралтай бүх бүтээгдэхүүнийг хууль ёсны дагуу цахим дэлгүүрт байршуулах ажлыг үе шаттай зохион байгуулахаар төлөвлөж байна.

Тус ажлыг Хүнс, хөдөө аж ахуй, хөнгөн үйлдвэрийн яам идэвхтэй дэмжиж байгаа бөгөөд төрийн өмчит Эрдэнэт, Эрдэнэс Тавантолгой зэрэг компаниуд ч дотоодын бүтээгдэхүүнээ худалдан авч хэрэглэх боломжийг идэвхтэй дэмжиж буйг албаныхан онцолсон юм.

Мөн уулзалтын үеэр “Давс үйлдвэрлэгчдийн холбоо”-ны тэргүүн Э.Сүхбаатар давс үйлдвэрлэгч, олборлогч нар өөрсдөө тендерт орж, авах нөхцөлийг бүрдүүлэх саналыг хүргэсэн бөгөөд ТХХАГ хүлээн зөвшөөрснөөр аж ахуйн нэгжүүд тендерт оролцох боломжтой болгох зохицуулалтыг хийх урьдчилсан тохиролцоонд хүрлээ.

Төлөөлөгчдийн хувьд дотоодын бүтээгдэхүүнийг төрийн бодлогоор дэмжих ажлыг зохион байгуулж байгаад баяртай байгаа тухайгаа дурдсан юм.