Архангай аймгийн Төвшрүүлэх, Хотонт сум нь аймгийн газар тариалангийн гол бүс нутаг юм. Аймгийн ИТХ-ын дарга П.Гомбодорж, Засаг дарга Б.Цэрэннадмид нар Төвшрүүлэх, Хотонт суманд энэ сарын 6-ны ажиллаж, хаврын тариалалтын ажилтай танилцлаа.
“Бага хангай” ХХК нь Төвшрүүлэх суманд үйл ажиллагаа явуулдаг бөгөөд 5 дугаар сарын 1-нээс үрлэгээний ажилдаа оржээ. Тус компани нийт 2000 гаруй га эргэлтийн талбайтай бөгөөд энэ хавар 1200 га-д тариалалт хийхээр төлөвлөсөн байна. Үүнээс 1100 га-д улаан буудай, 30 га-д овъёос, 70 га-д халтар арвай тариалж, га-гаас 15-20 центнер ургац авах зорилт тавьжээ.
Тус компани уламжлалт зурвасласан тариалалтын аргыг ашиглаж байгаа бөгөөд энэ нь хөрсний элэгдэл, гэмтлээс хамгаалдаг байна. Мөн үржил шим нь муудсан хэсэг талбайд эрдэс болон био бордоо ашиглан хөрсний үржил шимийг тогтворжуулжээ.
Хаврын тариалалтын үрлэгээний ажилдаа 440 морины хүчин чадалтай автомат хийн үрлэгч техникийг ашигласнаар өдөрт 100 га талбайд ажиллах боломж бүрдэж, цаг хугацаа болон шатахууны зардлыг хэмнэж чаджээ. Тус компани үрлэгээний ажлаа арав гаруй хоногт багтаан дуусгахаар ажиллаж байна.
“Бага хангай” ХХК нь 1992 онд байгуулагдсан, улсын дөрвөн удаагийн аварга тариаланч хамт олон юм. Өнөөдөр тус компанийн талбайд арваад хүн ажиллаж байна. Өнгөрсөн зунаас ажилчдынхаа халуун, хүйтэн устай орон сууцыг барьж эхэлсэн бөгөөд цахилгаан, дулааны хэрэгцээг 15 кВт-ын нарны эрчим хүчээр шийджээ. Сумын төвөөс үтрэм хүртэл 20 гаруй км зайтай, цахилгааны шугам татахад 1.5 тэрбум төгрөгийн зардал гарахаар байсан тул илүү хэмнэлттэй, байгальд ээлтэй шийдлийг ийнхүү сонгосон байна.
Аймгийн удирдлагууд газар тариалангийн үйлдвэрлэлийг бүх талаар дэмжин ажиллаж, орон нутагтаа гурил, тэжээлийн үйлдвэрлэлийг нэмэгдүүлэх, төр, хувийн хэвшлийн хамтын ажиллагааг өргөжүүлэх чиглэлд хамтран ажиллахаа илэрхийлжээ.
Архангай аймаг газар тариалангийн 25 мянган га эргэлтийн талбайтай бөгөөд энэ онд нийт 18.5 мянган га-д тариалалт хийхээр төлөвлөсөн талаар аймгийн ХХААГ-аас мэдээллээ.
Эх сурвалж: Монцамэ агентлаг
