Монгол Улсын Ерөнхийлөгч У.Хүрэлсүх “Хүнсний хувьсгал” үндэсний хөдөлгөөний хэрэгжилт, үр дүнтэй танилцан “ТЭСО Фүүдс парк”-ийн үйлдвэрт ажиллалаа.

Мөн Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн, Эдийн засаг, хөгжлийн яамны Төрийн нарийн бичгийн дарга И.Батхүү, Сангийн яамны Төрийн нарийн бичгийн дарга Б.Анар болон салбарын төлөөллүүд ажиллалаа.

ТЭСО Групп нь анхлан 1996 онд зайрмагийн торхон аяганы тоног төхөөрөмж үйлдвэрлэлийн чиглэлээр бизнесийн гараагаа эхлүүлж байсан бол өдгөө ТЭСО Фүүдс групп, ТЭСО Пропертис групп, ТЭСО Инвестмэнт групп, ТЭСО Индастриал парк групп гэсэн үндсэн дөрвөн чиглэлд 30 гаруй салбар компани, 2,500 гаруй ажилтантайгаар үйл ажиллагаа явуулж байна.

Монгол орны нөхөн сэргээгдэх түүхий эдээр олон улсын чанар, стандартад нийцсэн бүтээгдэхүүн үйлдвэрлэж, экспортыг нэмэгдүүлэх зорилготой “ТЭСО Фүүдс парк” цогцолбор 2025 онд ашиглалтад оржээ. Тус цогцолбор нь хүнсний үйлдвэрлэлээс гадна 150 хүүхдийн цэцэрлэг, хоногт 1000 м³ хаягдал ус боловсруулах цэвэрлэх байгууламж бүхий дэд бүтцийг цогцоор нь шийдсэн байна.

Ийнхүү үйлдвэрлэлийн хүчин чадлаа гурав дахин өсгөж, нэгж бүтээгдэхүүнд ногдох эрчим хүчний хэрэглээг хоёр дахин бууруулжээ.

Анхны хуурай сүүн бүтээгдэхүүн: Монгол үнээний сүүг орчин үеийн дэвшилтэт технологиор хатааж, уламжлалт цагаан идээг инновацитай хослуулсан “Зөв” брэндийн аарцны ундаа, хуурай аарцыг үйлдвэрлэдэг. Энэ нь малчдын гар дээрээс бэлтгэгддэг түүхий эдийг эдийн засгийн эргэлтэд оруулсан томоохон алхам болсон.

Хүнсний аюулгүй байдлын удирдлагын тогтолцоо болох ISO 22000, HACCP стандартын дагуу бүтээгдэхүүнээ ОХУ, БНХАУ, БНСУ зэрэг орнуудад экспортолж ирсэн юм.

Ажлын байр ба Малчдын орлого: Группийн хэмжээнд 2,500 гаруй хүн ажиллахаас гадна хөдөө аж ахуйн гаралтай түүхий эд (сүү, аарц, улаан буудай гэх мэт) бэлтгэн нийлүүлдэг мянга мянган малчид, тариаланчдыг тогтмол орлоготой болгожээ.