Завхан аймагт услалтын системийг сэргээн шинэчилж, усалгаатай тариалангийн хэмжээг нэмэгдүүлэх ажлууд үе шаттай хэрэгжиж байна.

Энэ нь “Хүнсний хувьсгал” үндэсний хөдөлгөөний хүрээнд орон нутгийн хүнсний үйлдвэрлэлийг дэмжих чухал ажил болж буйг салбарынхан онцолж байна.

Тэлмэн сумын Хүрэн талын услалтын системийг Азийн хөгжлийн банкны санхүүжилттэй төслийн хүрээнд бүрэн сэргээн засварлаж ашиглалтад оруулсан байна. Ингэснээр 477 га талбайг усалгаатай болгох нөхцөл бүрдэж, 300 га-д бороожуулагч, 200 га-д ил аргын усалгааны дэд бүтэц байгуулжээ.

Тэлмэн сум нь хур тунадас багатай, чийг дутагдалтай бүсэд тооцогддог тул шинэ систем ашиглалтад орсноор хүнсний ногоо, малын тэжээлийн ургамлын үйлдвэрлэлийг нэмэгдүүлэх боломж бүрдэж байна. Одоогоор Хүрэн талд 64 ногоочин, гурван аж ахуйн нэгж тариалан эрхэлж байгаа бөгөөд тариаланчид энэ жил тариалалтын хэмжээгээ нэмэгдүүлэхээр төлөвлөсөн талаар аймгийн ХХААГ-аас мэдээллээ.

Мөн Яруу суманд 60 га талбай хамарсан услалтын систем байгуулж, татмын ойжуулалт, ойн нөхөн сэргээлтийн усан хангамжийг шийдвэрлэсэн байна. Үүний хүрээнд Яруу, Эрдэнэхайрхан, Сантмаргаз, Цэцэн-Уул суманд нийт 60 га талбайд ойжуулалт хийж, газрын доорх ус болон нарны эрчим хүчинд суурилсан автомат дуслын усалгааны систем ашиглахаар төлөвлөжээ. Эрдэнэхайрхан суманд газар тариалангийн зориулалттай услалтын систем байгуулах тендер зарласан бөгөөд аймгийн хэмжээнд жижиг, дунд оврын услалтын системүүдийг үе шаттай хөгжүүлж байна.

Завхан аймаг “Хүнсний хувьсгал” хөдөлгөөний хүрээнд таван жилийн төлөвлөгөө хэрэгжүүлж, цаашид төмсний хэрэгцээний 60 хувь, хүнсний ногооны 40 хувийг дотоодын үйлдвэрлэлээр хангах зорилт дэвшүүлээд буй юм. Услалтын системүүдийг ийнхүү өргөтгөн хөгжүүлснээр уур амьсгалын эрсдэлтэй бүс нутагт тогтвортой газар тариалан эрхлэх боломж нэмэгдэх талаар аймгийн ЗДТГ-ын Хөгжлийн бодлого төлөвлөлт хөрөнгө оруулалтын хэлтсээс мэдээллээ.

Эх сурвалж: Монцамэ агентлаг