Дорнод аймаг өнгөрсөн оны жилийн эцсийн мал тооллогоор 2.7 сая толгой мал тоолуулсан. Нийт мал сүргийн 50 гаруй хувийг эдийн засгийн эргэлтэд оруулах боломжтой эр мал эзэлдэг бөгөөд үүний тал орчмыг жил бүр махны зориулалтаар ашиглаж байна. Ингэснээр жилд 15-18 мянган тонн мах бэлтгэх нөөц бүрддэг. Үүнээс 3000 орчим тонн махыг орон нутгийн хүн амын хэрэгцээнд зарцуулж, үлдэх 15 мянга орчим тонныг нийслэлийн зах зээлд нийлүүлэх болон экспортлох боломжтой.

Малын гаралтай түүхий эдийн нөөц нэмэгдэж байгаатай холбоотойгоор арьс, ширийг боловсруулж эдийн засгийн эргэлтэд бүрэн оруулах шаардлага тулгарч байна. Энэ хүрээнд Дорнод аймагт түүхий эд бэлтгэлийн нэгдсэн цэг байгуулж, стандартын шаардлага хангасан агуулах барихын зэрэгцээ ажлын байр шинээр бий болгохоор ажиллаж эхлээд байна.

Түүнчлэн Дорнод, Хэнтий аймгийн үхрийн арьс хэмжээ том, чанар сайтайгаараа онцлогтой. Иймээс зүүн бүсэд хөдөө аж ахуйн гаралтай бараа, түүхий эдийн худалдааг биржээр дамжуулан зохион байгуулах, түүхий эд бэлтгэн нийлүүлэлтийн нэгдсэн тогтолцоог бүрдүүлэхэд онцгой ач холбогдол өгч байгаа юм.

Одоогоор улсын үйлдвэрүүд ихэвчлэн өвлийн улиралд бэлтгэсэн арьс, ширийг боловсруулж эдийн засгийн эргэлтэд оруулж байна. Тиймээс цаашид зуны улиралд ч арьс, шир бэлтгэдэг тогтолцоог бий болгож, чанарын хамгаалалт хийсэн, давсалж хадгалсан, мал эмнэлгийн үйлчилгээ, баталгаажуулалтад хамрагдсан түүхий эдийг нийлүүлэхээр зорьж байна.

Эх сурвалж: Монцамэ агентлаг