Завхан аймаг усалгаатай газар тариаланг сэргээж, хүнсний ногооны хэрэгцээгээ 100 хувь дотоодын үйлдвэрлэлээр хангах зорилтын хүрээнд 64 га талбайд услалтын систем байгуулах ажлыг эхлүүлээд байна.

Аймгийн Засаг дарга Г.Өнөрбаяр, энэ амралтын өдрүүдэд төслийн хэрэгжилт, ажлын явцтай газар дээр нь танилцсан талаар аймгийн Засаг даргын Тамгын газраас мэдээлэв.

ХХААХҮЯ болон Азийн хөгжлийн банкны хамтын ажиллагааны хүрээнд хэрэгжиж буй төслийн дагуу 1.3 тэрбум төгрөгийн хөрөнгөөр дөрвөн километр урт ил болон далд услалтын шугам сүлжээ татаж, шаардлагатай тоног төхөөрөмжийг нийлүүлэх юм.

Үүнээс өмнө 500 сая төгрөгийн бүтээн байгуулалтын ажил хийсэн бөгөөд ийнхүү нийт 1.8 тэрбум төгрөгийн хөрөнгө оруулалтаар 64 га талбайг хамарсан усалгааны системийг байгуулж байна. Төслийн гүйцэтгэгчээр “Тэсийн бүрд” ХХК ажиллаж байгаа бөгөөд бүтээн байгуулалтыг ирэх есдүгээр сард дуусгахаар төлөвлөжээ.

Мөн ногоочдод зориулан экскаватор, анжис, унагалдай, үрлэгч, сийрүүлэгч, мөр хоорондын манагч, бордоо цацагч, ногоо хураагч зэрэг техник, тоног төхөөрөмжийг нийлүүлээд байна.

Цаашид услалтын системийн бүтээн байгуулалт дууссаны дараа нэгдсэн зоорь барих, өвлийн хүлэмж байгуулах, ногооны талбай орчмын газрын төлөвлөлтийг сайжруулах ажлуудыг хэрэгжүүлэхээр төлөвлөжээ. Мөн усалгааны усны чанарт мэргэжлийн байгууллагын шинжилгээ хийлгэх, техник, тоног төхөөрөмжийн ашиглалтыг сайжруулах зэрэг ажлыг үе шаттай хэрэгжүүлнэ.

Эх сурвалж: Монцамэ агентлаг