Нарийн, нарийвтар ноост хонь үржүүлгийн төсөл Сэлэнгэ аймагт амжилттай хэрэгжиж байна. Тус төсөл нь ерөө үүлдрийн хэсгийн нарийн болон нарийвтар ноост хонины чанар, ашиг шим, тоо толгойг нэмэгдүүлэх зорилготой юм.

Төслийн хүрээнд хангай, орхон үүлдэр болон ерөө үүлдрийн хэсгийн нарийн, нарийвтар ноост хонин сүргийн тоо 2026 оны байдлаар 11,264 толгойд хүрч, өмнөх оныхоос 1526 толгойгоор буюу 15.6 хувиар өссөн үзүүлэлттэй байна. Ингэснээр бүс нутгийн хэмжээнд ноосны үйлдвэрлэлийн бааз суурь тогтвортой өргөжиж, малчдын орлого нэмэгдэх нөхцөл бүрдэж байгааг мэргэжилтнүүд онцолжээ.

Жилд дунджаар 24.8 тонн нарийн, нарийвтар ноос бэлтгэж байгаа бөгөөд энэ нь дотоодын боловсруулах үйлдвэрүүдийн түүхий эдийн хангамжийг нэмэгдүүлэхэд чухал ач холбогдолтой юм.

Төслийн үр дүнд малчдын түвшинд бодит ахиц гарч байна. Австрали Улсаас импортолсон мерино үүлдрийн гүн хөлдөөсөн үр болон хөврөлийг ашиглан нийт 29 малчин өрх, 3 аж ахуйн нэгжийн 1052 хонинд дурангийн аргаар хээлтүүлэг хийж, дунджаар 41.5 хувийн төл бойжилтын үр дүн гарсан байна. Энэ нь нарийн ноост хонины цөм сүргийг богино хугацаанд өсгөхөд чухал дэмжлэг болж байна.

Төсөлд хамрагдсан малчин өрхүүдийн ноосны гарц, чанар сайжирч, хээлтүүлгийн үр дүн нэмэгдэн, төл бойжилт тогтвортой өсөх хандлагатай байгаа нь нарийн ноост хонин сүргийг үржүүлэх ажлын үр дүн, ач холбогдлыг тодорхой харуулж байна.

Эх сурвалж: Монцамэ агентлаг