Даланзадгад хотын өдрүүдийн хүрээнд салбар бүрийг хамарсан олон талт үйл ажиллагааг зохион байгуулж байна. Энэ хүрээнд энэ сарын 11-ний өдөр иргэдийн эрүүл хүнсний хэрэглээг дэмжих, хүнсний бүтээгдэхүүнийг зөв технологи, хадгалалтын горимын дагуу удаан хугацаанд хадгалах, боловсруулах арга зүйн практик сургалтыг явууллаа.
Сургалтад Даланзадгад сумын 50 гаруй иргэн хамрагдаж, таван багт хуваагдан 10 гаруй нэр төрлийн хүнсний ногоог хэрхэн зөв хадгалах, боловсруулах, хүнсэндээ зохистой ашиглах талаар мэдлэг, мэдээлэл авсан байна.
Сургалтыг агрономич О.Оюунтуяа удирдан явуулсан бөгөөд тэрбээр дараах мэдээллийг өглөө.
-Хүнсний ногоог даршлах, хадгалах чиглэлийн сургалтыг удирдан явууллаа. Сургалтаар иргэд өөрсдийн тариалсан хүнсний ногоог хэрхэн зөв даршилж боловсруулах, эрүүл ахуйн шаардлагад нийцүүлэн удаан хугацаанд хадгалах, хүнсэндээ зохистой ашиглах арга зүйн практик мэдлэг, мэдээлэл авсан. Оролцогчдод хүнсний ногоог боловсруулж, хадгалах шинэлэг арга технологийг газар дээр нь туршин суралцах боломж олгосноороо онцлог боллоо.
Бидний даршилж, нөөшилж байгаа эдгээр хүнсний ногоо нь удаан хугацаанд хадгалах боломж хязгаарлагдмал, чанарын хувьд түргэн муудах шинжтэй бүтээгдэхүүн юм. Иймээс бактергүй, халууны аргаар боловсруулан бэлтгэж байна. Зөв технологиор даршилж, нөөшилснөөр нэг жил, зарим тохиолдолд нэг жил хагас хүртэл хадгалж, хүнсэндээ хэрэглэх боломжтой болдог. Мөн хадгалалтын ямар нэг химийн бодис ашиглаагүй, органик байдлаар бэлтгэгддэг тул хүний эрүүл мэндэд эерэг нөлөөтэй.
Эх сурвалж: Монцамэ агентлаг
