Баян-Өлгий аймагт жил бүр дунджаар 700–800 га талбайд малын тэжээл тариалдаг байсан бол сүүлийн жилүүдэд энэ чиглэлийн ажил эрчимжиж, бодит үр дүнгээ өгч байна. Аймгийн Засаг даргын санаачилгаар малын тэжээлийн үйлдвэрлэлийг нэмэгдүүлэх, тариалангийн эргэлтийг өргөжүүлэх чиглэлээр олон ажил хэрэгжиж байна.
Аймгийн хэмжээнд анх удаа хөрсний шинжилгээний үр дүнд үндэслэн атар байсан 10 мянга орчим га газрыг тариалангийн зориулалтаар ашиглах боломжтой гэж тогтоон, тариалангийн эргэлтэд оруулаад байна. Энэ нь аймгийн газар тариалангийн салбарт томоохон ахиц болж байгаа юм.
Мөн Толбо сум-ын Толбо нуур багт 50 өрх хамтран 100 га талбайд ногоон тэжээл тариалах ажлыг эхлүүлж, амжилттай хэрэгжүүлж байна. Тус ажлын явцтай танилцах үеэр Ц.Идэрбат газар дээр нь ажиллаж, тариаланчидтай уулзан малын тэжээлийн үйлдвэрлэлийг нэмэгдүүлэх талаар төрөөс баримталж буй бодлого, цаашдын зорилтыг танилцууллаа.
Малын тэжээлийн дотоодын үйлдвэрлэлийг нэмэгдүүлэх энэхүү ажил нь мал аж ахуйн салбарын тогтвортой хөгжлийг хангах, өвс тэжээлийн хангамжийг сайжруулах, зуд болон цаг уурын эрсдэлийг бууруулахад чухал хувь нэмэр оруулах юм.
Эх сурвалж: Баян-Өлгий аймгийн Хүнс, хөдөө аж ахуйн газар
