Соёлын өвийн үндэсний төвөөс зохион байгуулсан “Монгол үндэстний уламжлалт идээ ундааны улсын аварга тогооч шалгаруулах II уралдаан” энэ сарын 19-20-ны өдрүүдэд болсон байна.
Энэ удаагийн уралдаанд Сэлэнгэ аймгийн Улсын тэргүүний II сургуулийн хамт олон амжилттай оролцож, нэг алт, хоёр хүрэл медаль хүртсэн нь орон нутгийн нийтийн хоол үйлдвэрлэл, сургуулийн хоол үйлчилгээний чанар шинэ түвшинд хүрч байгааг харуулсан байна.
Тодруулбал, ахлах тогооч Т.Энхжаргал дайвар бүтээгдэхүүнээр хийх хоолны төрөлд тэргүүлж, алтан медаль хүртсэн байна. Энэхүү төрөл нь уламжлалт хүнсний түүхий эдийг бүрэн ашиглах, шим тэжээлийг алдагдуулахгүй боловсруулах, хүнсний хаягдлыг бууруулах ач холбогдолтойгоороо онцлог юм.
Мөн тогооч Б.Энхцэцэг үр тариа, жимс жимсгэний төрлөөр хүрэл медаль хүртсэн нь эрүүл, шим тэжээллэг хүнсний хэрэглээг дэмжсэн бүтээлч шийдлийг үнэлүүлжээ. Харин хоол зүйч Ш.Соёлмаа нутгийн бренд идээ ундааны дээжний төрөлд хүрэл медаль хүртэж, Сэлэнгэ нутгийн онцлог бүтээгдэхүүн, уламжлалт амт, орон нутгийн хүнсний үнэ цэнийг сурталчилсан байна.
Уралдааны онцлог нь зөвхөн амт чанараар бус хоолны шим тэжээл, хүнсний аюулгүй байдал, түүхий эдийн зохистой хэрэглээ, уламжлалт өв соёлыг хадгалан хөгжүүлэх үзүүлэлтээр оролцогчдыг үнэлжээ.
Сэлэнгэ аймгийн багийн энэхүү амжилт нь боловсролын байгууллагын хоол үйлдвэрлэлийн үйлчилгээний чанарыг сайжруулах, хүүхэд, сурагчдад эрүүл, шим тэжээлтэй хоол хүргэх чиглэлээр ажиллаж буй мэргэжилтнүүдийн хөдөлмөр, ур чадварыг илтгэж буйгаараа ач холбогдолтой юм.
Тус уралдаанд 21 аймаг, нийслэлийн 200 гаруй тогооч оролцож, монгол уламжлалт хоол, хүнсний өв соёлыг орчин үеийн хэрэглээтэй уялдуулан хөгжүүлэх ур чадвараа сорьжээ.
