Нэгдсэн Үндэстний Байгууллагын Цөлжилттэй тэмцэх тухай конвенцын талуудын XVII бага хурлыг 2026 оны наймдугаар сарын 17-28-ны өдрүүдэд Монгол Улсад зохион байгуулах бэлтгэл ажлыг хангаж байна.

Энэ хүрээнд байгуулагдсан Үйлчилгээ, хоол, хүнсний хангамж, эрүүл ахуйн дэд хорооны VII хурал өнөөдөр буюу 2026 оны зургаадугаар сарын 25-ны өдөр болж, арга хэмжээний зохион байгуулалттай холбоотой хэд хэдэн чухал асуудлыг хэлэлцэж байна.

Хуралд дэд хорооны ахлагч, Улаанбаатар хотын Ерөнхий менежер Д.Ганболд, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Улаанбаатар хотын Захирагчийн ажлын албаны Хүнс, худалдаа, үйлчилгээний газрын дарга Ж.Дуламсүрэн болон ХХААХҮЯ, ЭМЯ, НЭМҮТ, ОБЕГ зэрэг төрийн болон төрийн бус байгууллагын төлөөллүүд оролцож байна.

Тус дэд хорооны үндсэн чиг үүрэг нь:

• Хоол хүнсний аюулгүй байдлыг хангах
• Эрүүл аюулгүй хоол, ундны үйлчилгээ үзүүлэгчид, түүнчлэн тусгай хэрэгцээт үйлчлүүлэгчдэд үйлчилгээ үзүүлэгч нарын төлөвлөлт, түүний бэлтгэл, зохион байгуулалтыг хариуцан ажиллах
• Хог хаягдалгүй, байгальд ээлтэй үндэсний хоол үйлдвэрлэл эрхлэгчдийг дэмжих, танилцуулах
• Хоол хүнсний аюулгүй байдлын стандарт, журам мөрдүүлэх, хоол хүнсэнд эрүүл ахуйн шалгалт хийх

Энэ удаагийн хурлаар Коп 17 /COP-17/ бага хурлын үйл ажиллагааны төлөвлөгөө болон оролцогчдын хоол хүнс, үйлчилгээний чанар, аюулгүй байдал, хүртээмжийг хангах чиглэлээр хэрэгжүүлэх ажлуудын талаар мэдээлэл солилцож, холбогдох асуудлаар байр сууриа нэгтгэв. Тодруулбал:

• Цэнхэр бүсийн “Food court”-д халал, веган, Ногоон бүсэд хоол үйлдвэрлэл, үйлчилгээ эрхлэгчийг сонгон шалгаруулах
• Нэгдсэн хөргөгч, хөргүүрийн хэрэгцээ шаардлага
• Арга хэмжээний үеэр “Vending machine” буюу автомат худалдаа, үйлчилгээний машин байршуулах эсэх
• Ирц бүртгэлийн хуудсыг хурлын тэмдэглэл албажуулах хавсралтад тооцох

Хурлын хүрээнд олон улсын арга хэмжээний үйлчилгээ, хоол хүнсний хангамж, эрүүл ахуй, логистикийн бэлтгэлтэй холбоотой шийдвэрүүдийг уялдуулах, цаашид хэрэгжүүлэх ажлын зохион байгуулалтыг тодорхойлоход анхаарч байгаа юм.