Хөвсгөл аймагт малын гаралтай түүхий эдийг орон нутагт боловсруулж, нэмүү өртөг шингэсэн бүтээгдэхүүний үйлдвэрлэлийг нэмэгдүүлэх зорилгоор 13 суманд бяслаг, сүү, цагаан идээний үйлдвэр байгуулахаар ажиллаж байна.
Одоогийн байдлаар Бүрэнтогтох, Алаг-Эрдэнэ сумын бяслаг, сүү, цагаан идээний үйлдвэрүүд үйл ажиллагаагаа эхлүүлээд байгаа бол Тосонцэнгэл сумын үйлдвэр бүрэн хүчин чадлаараа ажиллаж, бүтээгдэхүүнээ боловсруулан зах зээлд нийлүүлж эхэлжээ.
Бусад сумдад барилга угсралтын ажил 90 гаруй хувийн гүйцэтгэлтэй үргэлжилж байгаа бөгөөд ойрын хугацаанд нь бүрэн ашиглалтад оруулахаар ажиллаж байна. Бүрэнтогтох сумын үйлдвэр нь Италийн уламжлалт моцарелла болон гауда төрлийн бяслаг, мөн тараг, тарган ундаа, амталсан аарц, зөөхий зэрэг сүүн бүтээгдэхүүн үйлдвэрлэхээр ажиллаж байна.
Үйлдвэрийн үйл ажиллагааг тогтворжуулах, технологийн горимыг мөрдүүлэн хэвшүүлэх зорилгоор сүүний үйлдвэрийн менежер Б.Отгонбаяр, Монгол Улсын зөвлөх инженер, “Сүүн билэгдэл” компанийн захирал С.Цэцгээ нар үйлдвэрлэлийн технологи, тоног төхөөрөмжийн ашиглалт, ажиллуулах дараалал болон хөдөлмөрийн аюулгүй ажиллагааны чиглэлээр онол, практик хосолсон сургалт, зөвлөгөө өгч байгаа юм.
Мөн Бүрэнтогтох сумын бяслаг, сүү, цагаан идээний үйлдвэрт Төмөрбулаг, Цэцэрлэг, Эрдэнэбулган, Мөрөн сумын хоршоодын ажилчид технологи дамжуулах дадлага, практикийн сургалтад хамрагдаж, моцарелла болон гауда төрлийн бяслаг үйлдвэрлэх технологи, үйлдвэрлэлийн шат дамжлага, чанарын хяналт, тоног төхөөрөмжийн ашиглалтын талаар практик мэдлэг, ур чадвар эзэмшиж байна.
Технологи дамжуулах энэхүү сургалтыг Түнэл, Тариалан, Алаг-Эрдэнэ суманд зохион байгуулсан бөгөөд цаашид Их-Уул, Эрдэнэбулган суманд зохион байгуулахаар төлөвлөж байгаа юм байна.
Эх сурвалж: Монцамэ агентлаг
