Мал аж ахуйн салбарт орчин үеийн техник, технологийг нэвтрүүлэх, хөдөлмөрийн бүтээмжийг нэмэгдүүлэх, ноосны чанар, гарцыг сайжруулах зорилгоор цахилгаан хайчаар хонь хяргах сургалтыг Дундговь аймгийн Хулд суманд зохион байгууллаа.
Хонь хяргах сургалтыг аймгийн Засаг даргын Тамгын газар, Хүнс, хөдөө аж ахуйн газар, Хулд сумын ЗДТГ болон “Share Mongolia” ТББ хамтран зохион байгуулж байгаа бөгөөд малчдын ур чадварыг дээшлүүлэх, мал аж ахуйн үйлдвэрлэлийн үр ашгийг нэмэгдүүлэхэд чиглэсэн онцлог ажил болж байна. Малчид ихэвчлэн зургаадугаар сард хонио хяргаж ноосоо тушаадаг учир энэ нь цаг үедээ нийцсэн ач холбогдолтой ажил болж байгааг малчид хэлж байв.
Сургалтыг Шинэ Зеланд Улсын мэргэжлийн сургагч багш нар удирдан явуулж байгаа бөгөөд оролцогчдод цахилгаан хайчны бүтэц, ажиллагаа, аюулгүй ашиглалтын талаар онолын мэдлэг олгож, практик дадлага сургуулилтаар бататгаж байна. Мөн сургалтын үеэр хонь хяргах зөв техник эзэмшүүлэх, ноосны чанар, гарцыг нэмэгдүүлэх арга барил, хөдөлмөрийн бүтээмжийг сайжруулах шийдэл, олон улсын сайн туршлагыг нутагшуулах чиглэлээр мэдлэг, мэдээлэл солилцов.
Уламжлалт аргаар гар хайчаар хонь хяргах нь хөдөлмөр их шаарддаг, цаг хугацаа их зарцуулдаг бол цахилгаан хайч нэвтэрснээр нэг малыг богино хугацаанд, илүү хурдан хяргах боломж бүрдэж байгаа нь хөдөлмөрийн бүтээмжийг нэмэгдүүлэх, цаг хугацаа хэмнэх зэрэг олон давуу талтайг мэргэжилтнүүд хэллээ. Цаашид энэхүү сургалтыг үе шаттайгаар үргэлжлүүлж, орон нутгийн малчид, иргэдийг өргөнөөр хамруулах нь мал аж ахуйн салбарын тогтвортой хөгжилд хувь нэмэр оруулах боломж бүрдэх юм.
Эх сурвалж: Монцамэ агентлаг
