Булган аймгийн Засаг даргын “Булганы сэргэлт” хөтөлбөрийн хүрээнд хэрэгжиж буй “Эрүүл Булган” дэд хөтөлбөр, Монгол Улсын Ерөнхий сайдын “Чөлөөлье” санаачилгын хүрээнд хүнсний аюулгүй хэрэглээг дэмжих, иргэдийн эрүүл мэндийг хамгаалах зорилгоор зориулалтын бус савны хэрэглээнээс татгалзах, зөв дадлыг хэвшүүлэх арга хэмжээг хэрэгжүүлж байна.
Энэ хүрээнд “Хөдөө аж ахуй-хөгжлийн ирээдүй” ОНӨХХК-ийн 9.6 сая төгрөг, аймгийн төсвийн 12.0 сая төгрөгийн хөрөнгө оруулалтаар, нийт 21.6 сая төгрөгийн санхүүжилтээр хүнсний зориулалтын 135 ширхэг ган, зэвэрдэггүй нержэн савыг мал аж ахуйн гаралтай бүтээгдэхүүн борлуулагчдад олголоо.
Тодруулбал: Бугат сумын нутаг дахь “Түлүүгийн даваа”, Хутаг-Өндөр сумын “Мэргэн хөтөл”-ийн аж ахуйн гаралтай бүтээгдэхүүн борлуулах цэгийн 64 түрээслэгч, Булган сумын “Баясуулагч”, “Ханжаргалант”, “Цэцэгжин”, “Тулга” худалдааны төвүүдийн 7 цагаан идээний борлуулагч нарт зориулалтын савыг хүлээлгэн өглөө.
Энэхүү үйл ажиллагаа нь уламжлалт хүнсний бүтээгдэхүүний чанар, аюулгүй байдлыг хангах, иргэдийн эрүүл хэрэглээний соёлыг төлөвшүүлэх, “Хөх савнаас татгалзаж, эрүүл сонголтыг хэвшүүлэх” зорилготой юм.
Эх сурвалж: Булган аймгийн Хүнс, хөдөө аж ахуйн газар
