Мах, сүү, сүүн бүтээгдэхүүн нь хүний биеийн өсөлт хөгжил, дархлаа, булчин, ясны эрүүл мэндэд зайлшгүй шаардлагатай шим тэжээлийн гол эх үүсвэр юм. Харин эдгээр бүтээгдэхүүнийг зөв сонгож, аюулгүй хадгалж, зохистой хэрэглэж чадвал хүнсний гаралтай өвчлөлөөс сэргийлэхээс гадна эрүүл, тэнцвэртэй хооллолтыг хэвшүүлэхэд чухал ач холбогдолтой.

Мах нь чанартай уураг, төмөр, цайр, В бүлгийн амин дэмээр баялаг бөгөөд цус төлжилт, булчингийн үйл ажиллагаа, дархлааг дэмждэг. Харин сүү, сүүн бүтээгдэхүүн нь кальци, фосфор, уураг, А, D амин дэмийн чухал эх үүсвэр учраас яс, шүдийг бэхжүүлж, хүүхдийн өсөлт хөгжил, насанд хүрэгчдийн ясны сийрэгжилтээс урьдчилан сэргийлэхэд чухал үүрэгтэй.

Гэхдээ хүнсний бүтээгдэхүүний шим тэжээлийг бүрэн авахын зэрэгцээ аюулгүй байдлыг нь хангах нь хамгийн чухал юм. Мах худалдан авахдаа өнгө, үнэр, бүтэц нь хэвийн, гарал үүсэл нь тодорхой, мал эмнэлэг, ариун цэврийн хяналт шалгалтад хамрагдсан бүтээгдэхүүн сонгох хэрэгтэй. Сүү, сүүн бүтээгдэхүүн авахдаа үйлдвэрлэсэн болон дуусах хугацаа, хадгалалтын нөхцөл, сав баглаа боодлын бүрэн бүтэн байдлыг заавал шалгаж хэвших нь зүйтэй.

Махыг боловсруулахдаа түүхий болон болсон хүнсийг хооронд нь хүрэлцүүлэхгүй байх, тусдаа хутга, зориулалтын мод ашиглах нь нянгийн бохирдлоос сэргийлнэ. Мөн махыг бүрэн болгож хэрэглэх, хөлдөөсөн махыг тасалгааны температурт удаан гэсгээхгүй, хөргөгчинд аажмаар гэсгээх нь хүнсний аюулгүй байдлыг хангахад чухал ач холбогдолтой.

Сүү, сүүн бүтээгдэхүүнийг тогтоосон температурт хадгалж, нээлттэй бүтээгдэхүүнийг аль болох богино хугацаанд хэрэглэж дуусгах хэрэгтэй. Хөргөгчний хүйтэн хэлхээг алдагдуулахгүй байх нь бүтээгдэхүүний чанар, шим тэжээлийг хадгалахад чухал нөлөөтэй.

Мөн махыг хэт их хэмжээгээр хэрэглэхээс илүүтэй хүнсний ногоо, жимс, бүхэл үрийн бүтээгдэхүүнтэй хослуулан хэрэглэх нь тэнцвэртэй хооллолтын үндэс болдог. Өөх тос ихтэй махыг ойр ойрхон хэрэглэхээс зайлсхийж, чанах, жигнэх, уураар болгох зэрэг эрүүл аргыг сонгох нь зүйтэй. Өдөр тутмын хоолонд тараг, аарц, бяслаг зэрэг сүүн бүтээгдэхүүнийг тохирсон хэмжээгээр оруулснаар кальцийн хэрэгцээгээ хангаж, ясны эрүүл мэндээ хамгаалах боломжтой.