Европын Холбоо сүүлийн жилүүдэд хөдөө аж ахуйн салбартаа томоохон шинэчлэл хийж, Хөдөө аж ахуйн Нэгдсэн Бодлого (CAP)-ын шинэ хувилбарыг үе шаттайгаар хэрэгжүүлж эхлээд байна. Энэхүү бодлогын гол зорилго нь Европын фермерүүдийн өрсөлдөх чадварыг нэмэгдүүлэх, хүнсний тогтвортой байдлыг хангах, мөн захиргааны дарамтыг бууруулахад чиглэж байна.
Шинэчлэлийн хүрээнд Европын Холбоо фермерүүдэд чиглэсэн “зохицуулалтыг хялбаршуулах” багц арга хэмжээг баталжээ. Үүнд олон давхар тайлан, хяналт, шаардлагуудыг цөөлөх, төрийн захиргааны бичиг хэргийн ачааллыг бууруулах зэрэг өөрчлөлтүүд багтаж байна.
Европын Зөвлөлийн мэдэгдлээр, энэхүү бодлого нь “фермерүүд болон үндэсний захиргаанд илүү энгийн дүрэм журам бий болгож, үр ашиг, бүтээмжийг нэмэгдүүлэх” зорилготой гэж онцолсон байна.
Шинэ CAP бодлогын хамгийн чухал өөрчлөлтүүдийн нэг нь жижиг фермерүүдийг илүү хүчтэй дэмжих шийдвэр юм.
Жижиг аж ахуй эрхлэгчдэд олгох жилийн дэмжлэгийг нэмэгдүүлж, зарим тохиолдолд нэг удаагийн бизнес хөгжлийн тусламж олгох боломжийг өргөжүүлжээ.
Мөн жижиг тариаланчдын захиргааны шаардлагыг хялбарчилж, шалгалт, тайлагналын давтамжийг бууруулах зохицуулалт оржээ. Ингэснээр бага хэмжээний аж ахуй эрхлэгчид зах зээлд тогтвортой оролцох боломж нэмэгдэх юм.
Европын Парламентын мэдээллээр жижиг фермерүүдэд жилд олгох дэмжлэг 3,000 евро хүртэл нэмэгдэх шийдвэр гарсан байна.
Шинэ бодлого нь өмнөх CAP-ийн хатуу байгаль орчны нөхцлүүдийг тодорхой хэмжээгээр уян хатан болгож байна. Зарим экологийн шаардлагыг хэрэгжүүлэхэд фермерүүдэд илүү уян хатан боломж олгох шийдэл оржээ.
Органик аж ахуй эрхлэгчдийг зарим байгаль орчны стандартуудыг автоматаар хангаж байна гэж үзэх зохицуулалт ч багтсан байна. Энэ нь давхар тайлан, давхардсан шалгалтыг багасгах зорилготой юм.
Гэхдээ байгаль хамгааллын байгууллагууд энэхүү өөрчлөлт нь урт хугацаанд экологийн зорилтуудад нөлөөлж болзошгүй гэж анхааруулж байна.
Шинэчлэгдсэн бодлогоор гишүүн орнууд байгалийн гамшиг, ган гачиг зэрэг нөхцөлд өртсөн фермерүүдэд шууд хямралын төлбөр олгох боломжтой болжээ.
Энэ нь уур амьсгалын өөрчлөлтөөс үүдэлтэй эрсдэл нэмэгдэж буй өнөөгийн нөхцөлд хөдөө аж ахуйн салбарыг тогтвортой байлгах зорилготой гэж үзэж байна.
Европын Холбоо нийт CAP санхүүжилтийн хүрээнд фермерүүдийн орлогын дэмжлэг болон хямралын тусламжийг тусгайлан баталгаажуулсан хэвээр байна.
Мөн хөдөө аж ахуйд технологи, инновацийг түлхүү нэвтрүүлэхийг дэмжиж байна. Фермерүүдийг ухаалаг технологи, дижитал хяналт, үр ашигтай ус хэрэглээний системд шилжихийг урамшуулж байна.
Эх сурвалж: https://www.consilium.europa.eu/en
