Завхан аймгийн Эрүүл мэндийн газраас иргэдийн эрүүл мэндийг хамгаалах, тамхины хэрэглээ болон дам тамхидалтыг бууруулах зорилгоор Тамхины хяналтын тухай хуульд оруулах шинэчлэлийг дэмжих уриалгыг өрнүүлж байна.

“Эрүүл иргэн-Эрүүл гэр бүл-Эрүүл монгол” уриан дор иргэдийг тамхинаас татгалзах, хүүхэд, жирэмсэн эмэгтэйчүүдийг дам тамхидалтаас хамгаалах, олон нийтийн тамхигүй орчныг бий болгоход идэвхтэй оролцохыг уриалжээ.

Монгол Улсад мөрдөгдөж буй Тамхины хяналтын тухай хууль нь хүн амыг тамхины хэрэглээ, дам тамхидалтаас үүдэлтэй эрүүл мэндийн эрсдэлээс хамгаалах, тамхины хэрэглээг бууруулах, тамхигүй орчныг бүрдүүлэх эрх зүйн үндсийг тодорхойлдог. Сүүлийн жилүүдэд электрон тамхи, шинэ төрлийн никотин агуулсан бүтээгдэхүүний хэрэглээ нэмэгдэж байгаатай холбоотойгоор хуулийн зохицуулалтыг шинэчлэх шаардлага үүсээд байгаа талаар холбогдох байгууллагууд онцолж байна.

Эрүүл мэндийн яамнаас танилцуулсан STEPS-2019 үндэсний судалгааны мэдээллээр Монгол Улсад, насанд хүрсэн 5 хүн тутмын нэг нь буюу 24.2 хувь нь тамхи татдаг.

Эрэгтэйчүүдийн 43.7 хувь, эмэгтэйчүүдийн 5 хувь нь тамхи хэрэглэдэг бөгөөд эрэгтэйчүүдийн хэрэглээ эмэгтэйчүүдээс 8.7 дахин их байна. Тамхи татаж эхэлсэн дундаж нас 18.9 байна. Тамхи татдаг хүн өдөрт дунджаар 10.7 ширхэг янжуур хэрэглэдэг. Гэртээ 32.6 хувь нь дам тамхидалтад өртөж байгаа бол ажлын байранд 22.8 хувь нь бусдын татсан тамхины утаагаар амьсгалдаг байна. Тамхинаас гарах талаар бодож буй иргэдийн эзлэх хувь 57.4 хувь байгаа нь тамхинаас гарахад зөвлөгөө, эмчилгээ, дэмжлэгийн үйлчилгээ шаардлагатайг харуулж байна.

Мөн хүн амын ердөө 13.7 хувь нь тамхины эсрэг сурталчилгаа, мэдээлэлтэй тогтмол хүрч байгаа нь урьдчилан сэргийлэх ажлыг эрчимжүүлэх шаардлагатайг илтгэжээ.

Бүсчилсэн үзүүлэлтээр Улаанбаатар хотод тамхины хэрэглээ 26.2 хувь, баруун бүсэд 21.4 хувь байгаа нь баруун бүсийн дундаж харьцангуй бага боловч таван хүн тутмын нэг нь тамхи татаж буйг харуулж байна.

Иймээс Завхан аймгийн Эрүүл мэндийн газар энэ онд урьдчилан сэргийлэх чиглэлээр хэд хэдэн томоохон үйл ажиллагааг хэрэгжүүлж байна. Үүнд зүрх, судасны өвчнөөс урьдчилан сэргийлэх, даралт ихсэлтийн эрт илрүүлэг, эрүүл амьдралын хэв маягийг төлөвшүүлэх сургалт, олон нийтийн мэдээлэл сурталчилгааны ажлыг аймаг, сумдын хэмжээнд тогтмол зохион байгуулж байгаа бөгөөд архаг халдварт бус өвчний эрсдэлт хүчин зүйлсийг бууруулахад онцгой анхаарч ажиллаж байна.

Эрүүл мэндийн байгууллагуудын үзэж байгаагаар тамхины хэрэглээг бууруулах нь зөвхөн нэг хүний эрүүл мэндийг хамгаалахаас гадна зүрх судасны өвчин, уушгины хавдар, амьсгалын замын архаг өвчин, харвалт зэрэг олон төрлийн өвчлөлийг бууруулж, эрүүл мэндийн салбарын санхүүгийн ачааллыг багасгах чухал ач холбогдолтой юм хэмээн Завхан аймгийн Эрүүл мэндийн газраас мэдээллээ.