Говийн эрс тэс уур амьсгалд алим ургуулж, орон нутгийн брэнд бүтээгдэхүүн бий болгосон залуу гэр бүлийн санаачилга бодит үр дүнгээ өгч байна.
Дундговь аймгийн Сайнцагаан суманд үйл ажиллагаа явуулдаг “Арвин их сан” ХХК жимс, жимсгэнэ нутагшуулах төслийг үе шаттай хэрэгжүүлснээр 2000 орчим алимын мод бүхий аж ахуйг хөгжүүлж, “Мандалговийн алим” нэрийн бүтээгдэхүүнээ дотоодын зах зээлд нийлүүлэх хэмжээнд хүрчээ.
Тус компани 2019 онд өрхийн аж ахуйн хэлбэрээр Минжит булган, Алтайское десертное, Ганзагын улаан зэрэг алимны сортыг туршилтаар тариалж эхэлсэн байна. Энэ хугацаанд говийн хуурай, эрс тэс уур амьсгалд моддыг дасан зохицуулах боломжийг судалж, арчилгаа, усалгааны технологио тасралтгүй боловсронгуй болгосны үр дүнд 2022 онд анхны ургацаа хураан авч, үйлдвэрлэлийн шатанд шилжжээ.
Өдгөө тус аж ахуй хоёр га талбайд 2000 орчим алимын мод тарьж, дэвшилтэт усалгааны систем, ургамал хамгааллын технологийг ашиглан ургацын тогтвортой байдлыг ханган ажиллаж байна. Цаашид тариалангийн талбайгаа нэмэгдүүлэхийн зэрэгцээ чавга болон бусад жимсний төрлийг нутагшуулахаар төлөвлөжээ.
“Мандалговийн алим” брэнд нь орон нутгийн онцлогт тохируулан тарьж ургуулсан шинэхэн жимсийг дотоодын зах зээлд нийлүүлэх зорилготой бөгөөд говийн бүсэд жимс, жимсгэнэ амжилттай нутагшуулж болохыг бодитоор харуулж буй жишээ болж байна.
Мөн энэхүү аж ахуй нь орон нутагт ажлын байр бий болгож, залуусын санаачилгыг тогтвортой бизнес болгон хөгжүүлж буйгаараа онцлогтой. Үүсгэн байгуулагч П.Очирбат, Г.Жавзмаа нар бүтээгдэхүүндээ түшиглэн аялал жуулчлал, сургалт, танин мэдэхүйн чиглэлийн үйл ажиллагааг хөгжүүлэхээр зорьж байгаагаа онцлон ярилаа.
Ийнхүү залуу гэр бүлийн хөдөлмөр, туршилт, инновацид тулгуурлан хөгжүүлсэн “Арвин их сан” ХХК-ийн алимны аж ахуй нь Дундговь аймагт хүнсний үйлдвэрлэл, жижиг, дунд бизнесийг төрөлжүүлэхийн зэрэгцээ орон нутгийн брэнд бүтээгдэхүүн хөгжүүлэх шинэ боломжийг нээж буй бодит жишээ болж байна.
Эх сурвалж: Монцамэ агентлаг
