Хүнс, хөдөө аж ахуйн газраас хүнсний аюулгүй байдал, иргэдийн эрүүл мэндийг хамгаалах, болзошгүй эрсдэлээс урьдчилан сэргийлэх зорилгоор төлөвлөгөөт бус хяналт шалгалтыг зохион байгуулжээ.
Шалгалтад Дашинчилэн, Хишиг-Өндөр, Сэлэнгэ, Хангал сум, Хялганат тосгоны хүнс, хоол үйлдвэрлэл, үйлчилгээ, хүнсний худалдааны чиглэлээр үйл ажиллагаа эрхэлдэг 15 аж ахуйн нэгж, 7 иргэн буюу нийт 22 объектыг хамруулсан байна.
Хяналт шалгалтын явцад холбогдох хууль, эрх зүйн хэрэгжилтийг хангах чиглэлээр 42 иргэн, аж ахуйн нэгжид мэргэжил, арга зүйн зөвлөгөө өгч, илэрч болзошгүй зөрчил, эрсдэлээс урьдчилан сэргийлэх зорилгоор улсын байцаагчийн 69 заалт бүхий 3 зөвлөмжийг хүргүүлэн ажиллажээ.
Хяналт шалгалтыг ХХААХҮ-ийн сайдын 2026 оны А/233 дугаар тушаал, Салбарын улсын ерөнхий байцаагчийн баталсан 08-00-02/27 дугаартай удирдамжийн хүрээнд зохион байгуулсан байна.
Шалгалтаар дараах зөрчлүүд илэрсэн байна.
-Хугацаа нь дууссан хүнсний түүхий эд, бүтээгдэхүүнийг худалдсан
-Мал эмнэлэг, ариун цэвэр, гарал үүслийн баталгаажуулалтын гэрчилгээгүй мах, махан бүтээгдэхүүн болон бусад түүхий эдийг нийлүүлсэн
-Хүнсний бүтээгдэхүүнийг шаардлагатай температур, чийглэгийн нөхцөлд бус, зориулалтын бус газарт хадгалсан
-Зарим аж ахуйн нэгж үйлдвэр, цехдээ халдваргүйтгэл тогтмол хийлгэдэггүй, тээврийн хэрэгслээ ариутгадаггүй
-Хүнсний түүхий эдийг хөргүүргүй, зориулалтын бус тээврийн хэрэгслээр тээвэрлэсэн
-Хөргөлтийн болон технологийн бүртгэл хөтлөөгүй, мал эмнэлгийн бүртгэл дутуу байжээ.
Илэрсэн зөрчлүүдийг арилгах талаар холбогдох аж ахуйн нэгжүүдэд заавар, зөвлөмж өгч, газар дээр нь шийдвэрлэжээ.
Эх сурвалж: Монцамэ агентлаг
