Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Газрын доройтол, цөлжилттэй тэмцэхэд зөвхөн бодлого, технологи бус, газар нутагтайгаа өдөр бүр харилцан амьдардаг орон нутгийн иргэд, малчид, тариаланчид, эмэгтэйчүүд, залуучуудын эрх, мэдлэг, туршлага, оролцоо чухал.
НҮБ-ын Цөлжилттэй тэмцэх конвенцын Талуудын 17 дугаар бага хурал буюу COP17 Улаанбаатар хотноо үргэлжилж байна. “Газрыг сэргээж, итгэл найдвараа сэргээе” уриан дор зохион байгуулагдаж буй тус хурлын наймдугаар сарын 19-ний өдрийн албан ёсны хөтөлбөрөөр газар доройтол, гангийн тэсвэржилт, санхүүжилт, шинжлэх ухаан бодлогын уялдаа болон тогтвортой газар ашиглалтын асуудлууд голлон хэлэлцэж байна.
Өнөөдөр өглөө Конвенцын хэрэгжилтийг хянах хороо (CRIC) хуралдаж, Конвенцыг хэрэгжүүлэхэд шаардлагатай нэмэлт хөрөнгө оруулалт, санхүүгийн механизмтай харилцах асуудлыг үргэлжлүүлэн хэлэлцэж байна. Мөн Глобал механизмын нөөц дайчлах ахиц, Тогтвортой хөгжлийн зорилтын 15.3 дахь зорилт болон хувийн хэвшлийн оролцооны талаар интерактив хэлэлцүүлэг өрнөж байна.
Үүний зэрэгцээ Шинжлэх ухаан, технологийн хороо (CST) хуралдаж, хөдөө аж ахуйн газрын доройтлыг бууруулах, зогсоох, сэргээх арга зам, шинжлэх ухаан-бодлогын интерфейсийн 2027–2030 оны ажлын хөтөлбөр болон CST-ийн 18 дугаар чуулганы ажлын хөтөлбөрийг хэлэлцэж байна.
Өнөөдөр үдээс хойш Конвенцын Бүхэл бүтэн хороо (COW) хуралдаж, бодлогын хүрээ болон сэдэвчилсэн асуудлын хүрээнд шилжилт хөдөлгөөн, газрын эзэмшил ашиглалт, хувийн хэвшлийн оролцоо, бизнесийн оролцооны стратеги зэрэг асуудлыг авч үзнэ. Мөн CRIC болон CST-ийн хамтарсан нэгдсэн хуралдаанаар тайлагналын мэдээлэл солилцох, тайлангийн чанар, хэлбэрийг сайжруулах, шинжлэх ухаан ба бодлогыг уялдуулах асуудлыг хэлэлцэхээр төлөвлөжээ.
Ийнхүү COP17-ийн гурав дахь өдөр газар, ус, гангийн асуудлыг зөвхөн байгаль орчны хүрээнд бус санхүүжилт, шинжлэх ухаан, технологи, бизнес, мал аж ахуй, уламжлалт мэдлэг, залуучуудын оролцоо зэрэг олон талын уялдаатайгаар хэлэлцэж байна.
Монгол Улс зохион байгуулагч орны хувьд дэлхийн улс орнуудын туршлага, шинжлэх ухааны мэдлэгийг нэгтгэн, газрын доройтлыг бууруулах, бэлчээрийн тогтвортой менежмент, гангийн эрсдэлийг даван туулах шийдлүүдийг хэлэлцэх олон улсын чухал талбар болж байна. COP17 нь Улаанбаатар хотноо 8 дугаар сарын 17–28-ны өдрүүдэд үргэлжилнэ.
